Comezamos esta nova edición do noso Diario confirmando un segredo a voces. O vilalbés Kiko xa é novo xogador do Atlético Arteixo. O defensor viña de acadar o ascenso coa SD Compostela a Segunda RFEF e agora engade un novo equipo ao seu extenso curriculum.

O Folgueiro segue a perfilar o seu equipo na tempada da súa volta á Primeira Futgal. Asinou a contratación do atacante Racha, procedente do San Ciprián, conxunto no que militou as últimas temporadas.

Novidades en dous conxuntos de novo cuño na Terceira Futgal. O Río Ouro contará con Asier, outro dos xogadores surxidos da súa base, mentres que o Corgo B xa ten adestrador. Será Pablo Bargados, cargo que compaxinará coa súa labor na base do Sagrado Corazón.

Sen saír da categoría, a Comercial fichou a Diego Arza, futbolista que procede da Piringalla e anteriormente militou no San Roque. O Carballedo renovou a Adrián Doval, mentres que o Cazás fixo o propio con Rober. O Celeiro reforzouse coa chegada de Dani, central formado na base da SD Viveiro.