A pouco máis de dez días para o mes de setembro, o mercado segue movéndose, sobre todo na Terceira Galicia, que concentra moitas das novidades de hoxe. Na zona sur, o Relámpago Taboada renova a Moure, Iván e Hugo para a nova temporada. Máis ao norte, o filial da Sarriana anunciou a súa fichaxe máis destacada: o dianteiro Álex Abella, ex de Portomarín e Paradela, súmase ao proxecto dirixido por Míchel. O ariete estará acompañado, na súa maioría, por futbolistas recén saídos dos xuvenís da Ribela, que acadaron un histórico ascenso a Liga Galega Xuvenil a pasada campaña.

Alén diso, un club veciño da Sarriana, o Páramo, renova ao prometedor Álvaro Irimia. Tamén o Matela, neste caso no grupo norte, conta con novidades. Os de Outeiro de Rei incorporan a Ian, natural de Meira e procedente da Comercial B. Suman así a un xogador importante para o lavado de cara que queren levar a cabo os chairegos de cara ao inicio de campaña.

Non só hai novidades na Terceira. O San Roque, da Segunda Galicia, contará co goleador Esteban para suplir a marcha de Dhomi. O atacante chega, precisamente, desde o conxunto xuvenil da Sarriana que acadou o ascenso á Liga Galega. Ademais, nun fútbol feminino que está de noraboa, o PM Friol incorpora a xogadoras importantes para o novo curso: Itziar Rodríguez (Parquesol), Asia Antón (Granada CF), Marta Gutiérrez (Pradejón B), Ángela Lozano (Olímpico de León), Isa Martín (Real Avilés), Elena Pérez (Sárdoma) e a xa anunciada nesta web Antía Delgado (Viajes Interrías).