Chega unha nova edición do mercado do fútbol lucense, con novidades de punta a punta da provincia. En primeiro lugar, o Viveiro non quere pasar apuros nunha nova campaña en Terceira RFEF. Para iso, os celestes veñen de incorporar aos mediocentros Diego Núñez (ex de Pol e Ribadeo) e Manu Martín, que chega desde o Jerez de los Caballeros (vía El Progreso).

Outro equipo mariñán que quere evitar os sustos do ano pasado é o Ribadeo. Os do Pepe Barrera afrontan unha nova temporada cun cadro de xogadores de garantías no que renova Aitor. O talentoso extremo seguirá xogando no conxunto da súa vila, ao que chegou no mercado invernal. Os ribadenses despiden, porén, a Xurde, que vestirá a camisola do Caudal de Mieres. Se cambiamos da Mariña Oriental cara a Occidental, o Celeiro vén de renovar a Tátiko, a David Balsa e a Sousa.

Na Terra Chá, o Castro buscará a permanencia na Preferente Norte apoiándose na solidez defensiva. Diego Muiña renova como unha das pezas chave da defensa de Rafa Casanova para a 23/24. O central lucense foi todo un seguro no ascenso dos de Ribeiras de Lea.

Xa na zona sur, o Quiroga quere consolidarse na Segunda Galicia, para o que renova a Javi Coba, un xogador máis que contrastado na comarca. Pola súa banda, o Río Sil asinou ao lateral zurdo Omar, que se suma aos fichaxes que chegaron desde a base do Monforte CF.