Os conxuntos lucenses continúan coa configuración dos seus cadros de xogadores. É o caso da Residencia que anunciou a renovación de Rois, Yeray, Lucas e Dani López. O Lemos anunciou a renovación de Álvaro, Mauro e Borja Castro, así como a contratación do polivalente Samu, que chega procedente do Castro. Tamén continuará no Ribadeo un dos puntais da súa defensa, o veterán Prosi.

Non seguirá no Viveiro o ‘comandante’ Marino. O meirego pon fin á súa etapa no cadro celeste.

O Lourenzá presentou cinco caras novas. Aínda que boa parte delas xa coñecen ben Santa Cruz. Imad sube do xuvenil, mentres que Xoel retorna ao conxunto albivermello logo do seu paso polo Mondoñedo, ao igual que Aarón, despois da súa experiencia no Xove Lago. Tamén estarán ás ordes de Roberto Ramallal Edu, procedente do Viveiro Xuvenil e Miguel Casanova que chega desde o Alfoz. O gardameta Edgar Tourón, a última temporada nas filas do Riotorto deixa o fútbol lucense e defenderá a portería do Orillamar coruñés. Outro gardameta é noticia. Gabi continuará un ano máis defendendo o arco do Sporting Pontenova.

O Iberia comezou a poñer as bases do seu novo proxecto. E fíxoo anunciando a renovación do seu corpo técnico. José Manuel, logo da gran temporada realizada no conxunto de San Miguel, continuará á fronte do equipo. Copete será o seu axudante, posto ao que tamén se incorpora Marcos García Bao ‘Balbón‘, recentemente retirado, que seguirá así no organigrama do Iberia.