A Axenda do fin de semana (19-20 de outubro)

Ademáis do Partido da Xornada, que pon en xogo o liderato no grupo Sur de Segunda Autonómica, esta xornada tráenos partidos interesantes en tódalas categorías. Aquí unha pequena escolma:

Preferente Norte

 – Ribadeo F.C.  – Xallas F.C. (Sábado ás 17:30 horas no Martínez Otero): os de Rafa Casanova, desta volta en Foz, buscarán a súa terceira vitoria consecutiva. Reciben ao colista, un Xallas que aínda non conseguiu gañar nesta temporada.

Poratti reencontrouse co gol no triunfo ribadense ante o Montañeros

– Viveiro C.F. – S.D. Residencia (Domingo ás 12 horas en Cantarrana): derbi provincial no que o conxunto local tentará consolidalo liderato categoría. Enfronte os de Álvaro Meilán, que logo de acadar sete dos últimos nove puntos en xogo, aupáronse á zona media da clasificación.

Primeira Autonómica

 – S.D. Outeiro de Rei – S.D. Burela (Domingo ás 16:30 horas no Municipal de Outeiro): o conxunto local, nun gran momento de xogo e resultados, tratará de mantelo liderato diante dun Burela que precisa os tres puntos. Os de Jaime, logo de dúas xornadas sen gañar, non queren verse relegados das primeiras posicións.

O Outeiro de Rei tentará mantelo liderato ante o Burela, outro dos candidatos ao ascenso

 – Atlético Escairón – S.D. Chantada (Domingo ás 17 horas no Municipal do Saviñao): encontro entre dous dos perseguidores do líder. O cadro local, con só tres tres tantos encaixados e nove puntos acadados de xeito consecutivo, recibe a un Chantada que buscará superalo na clasificación.

Segunda Autonómica

 – Mondoñedo F.C. – Abadín C.F. (Sábado ás 17:30 horas no Viñas da Veiga): o ‘Derbi do Fiouco’. En plenas festas das San Lucas, o conxunto local buscará un motivo máis para celebrar. Triunfo máis que necesario para os dous equipos, que aínda non saben o que é gañar nesta campaña.

– S.D. Candelaria – C.D. San Ciprián (Sábado ás 17 horas na Granda): derbi entre os dous equipos do concello de Cervo. O conxunto local, que non perde desde a primeira xornada ligueira, tentará poñerllo complicado ao líder da categoría. Os de Carra, que só cederon un empate ante o Celta Barreiros, buscarán distanciarse dos seus rivais xa desde o comezo.

Terceira Autonómica

 – Fonsagrada Balompé – S.D. Viveiro (Sábado ás 19:30 horas no Gómez Besteiro): encontro entre conxuntos que contan os seus encontros por vitorias. O equipo local, aínda que cun encontro menos parece disposto, este ano si, a pelexar polo ascenso directo. Enfronte, o filial viveirense, no seu primeiro ano en competición, deixa claros os seus obxectivos.

 – C.D. Sober – Sporting Lucense (Sábado ás 16:15 horas en Centeás): o cadro local, que se amosa máis sólido lonxe do seu campo, recibe aos lucenses, que contan os seus encontros por vitorias, coa intención de logralos primeiros tres puntos na casa.

O Sober buscará un triunfo que se lle resisten en Centeás

Reto Iberdrola

 – Peluquería Mixta Friol – F.C. Barcelona B (Domingo ás 12 horas na Reigosa): ámbolos conxuntos chegan a este encontro logo de perder os dous últimos partidos. Un triufo situaría ás lucenses nun zona cómoda na clasificación.

Segunda División Galega Feminina

 – S.D. Chantada – Sporting Burgo (Domingo ás 19 horas no Sangoñedo): urxe un triunfo para as chantadinas. Con catro xornadas disputadas aínda non foron quen de puntuar. O rival, despois dun mal comezo, chega logo de tres encontros sen perder.

Liga Fútbol 7 Feminina

 – S.D. Burela – Atlético San Pedro (Sábado ás 20 horas no Anexo á Marosa): as mariñáns xa amosaron as súas cartas no primeiro encontro. Buscarán un novo triunfo que as sitúe na cabeza da clasificación. O rival tamén sacou adiante o encontro inaugural.

Imagen por defecto
Marcos Fernández
Apaixoado do fútbol, en especial do modesto, que aínda mantén os verdadeiros valores do deporte
Artículos: 409

Deja un comentario