Comezamos un diario capicúa cunha triste nova na portería da Reigosa, pois Isa Martín deixa de ser gardamallas do PM Friol. A súa última participación de curto na provincia foi no VI All Star Futbolinlugo o pasado 28 de xuño. No fútbol masculino, o central Édgar Redondo debutará na Segunda RFEF logo de acadar o ascenso co Arosa SC. Hugo Díaz, pola súa banda, cambia o CD Lugo ‘B’ por outro club conveniado, a Sarriana.

Tamén chegan xogadores desde a canteira albivermella ao Viveiro. Os de Cantarrana incorporan a Izan Serrano, defensor zurdo procedente do Polvorín, e a Raúl Ferreiros, outro zagueiro que comezará a súa etapa sénior vestido de celeste logo de grandes números na División de Honra Xuvenil.

A Chaira concentra os movementos deste diario

Na Preferente, o Lemos anunciou as renovacións do xogador Álex Lamus e do preparador físico Marcos Otero. Os da Pinguela dan así continuidade a un proxecto que pretende asaltar a Terceira RFEF. Por outra banda, hai moitas novidades na Primeira Futgal, especialmente na Terra Chá. O Outeiro de Rei comunicou a renovación de 16 xogadores, sendo os últimos en anunciarse Iván Navia, Ily, Gabri Santeliz e Dani Debasa. Este último compartirá equipo co seu irmán Alejo.

O central Xabi Tubío, pola súa banda, volve á estrutura do Racing Villalbés. O de Matela chega ao filial logo de saír mediada a campaña pasada ao Riotorto, cando aínda estaba en idade xuvenil. Preto de alí, o recén ascendido Catro Roldas buscará a permanencia na Segunda. Para iso, os do Catro Ventos renovan a Santi Cazás, que cumpre o seu sexto ano no club. Tamén o Abadín reforza o seu cadro coa chegada do defensor Dani Díaz, que vivirá a súa primeira experiencia sénior tras saír da base do Racing Villalbés. Ademais, Vigo e Tucho continúan no Municipal.

O diario ten moito movementos nesa zona e, na mesma categoría, o Xermade está a manter un cadro sólido, pois vén de anunciar a continuidade do porteiro Juan Gómez ‘Juanxo‘. O Ferreira fai o propio tras asegurar ao atacante David García ‘Chomi’, que xogará por segundo ano consecutivo no Baliño. Por último, o mediocentro da Pontenova Borja Lombardero seguirá no Real Tapia. O talento mariñán vivirá a súa segunda temporada no club asturiano, que milita na Terceira Asturfútbol.