Xairo e Pedro foron dous dos protagonistas da 11ª xornada da Segunda Futgal. Xairo anotou un dobrete na vitoria in extremis conseguida polo Becerreá no campo do San Roque. O triunfo neste duelo directo permítelle ao club da montaña volver ao primeiro posto. Con todo, séguelle de cerca un Santa Comba eficaz.

Pedro Coria marcou tres goles na goleada do Xermade ao Meira, un dos equipos coa mellor xeira do grupo. O Xermade suma puntos, mentres Riotorto, Folgueiro e Alfoz tamén exercen o seu dominio nos postos cabeceiros. Contamos a pasada xornada a través de #ONoso11AChaira.

Echavarri encamiñou a oitava vitoria do Riotorto

O club riotortense mantense no primeiro posto da clasificación por segunda semana consecutiva. Sumou o quinto triunfo seguido e o oitavo do curso ante a Candelaria (4-0). Alcanza os 26 puntos, un máis que o Folgueiro. 

Pola súa parte, a Candelaria vive o seu peor momento da tempada en canto a resultados. Enlaza tres derrotas consecutivas. Queda con 13 puntos, na zona media baixa da táboa clasificatoria. 

Ao descanso os locais xa marcharon cunha diferenza de tres goles. Ao redor da media parte, David Echavarri anotou un dobrete en tres minutos. O dianteiro logrou dous grandes tantos e despois tivo que ser substituído ao descanso por unha dura entrada. Antes do final dos primeiros 45 minutos, Carlos fixo o terceiro. 

Ao pouco de comezar o segundo tempo, Simón logrou a sentencia definitiva co cuarto gol. Ademais do golpe de Echavarri, tamén se lesinou Pedro, que ten unha escordadura grave. 

O Riotorto segue incorporando xogadores

O cadro da Veiga ten cinco caras novas con respecto aos futbolistas que saíron na VI edición da Guía ‘Fútbol en Lugo’. Ás chegadas dos irmáns Pedro e Jaime Pernas, Maicol e Jerson, uniuselles nas últimas semanas a fichaxe de Xabi Tubío. O futbolista, aínda en idade xuvenil, procede do Racing Villalbés. Logo de debutar na 10ª xornada, gozou da súa primeira titularidade ante a Candelaria. 

Hai que ter en conta tamén que o conxunto preparado por Isaac Rouco sufriu dúas baixas de longa duración en defensa. Ches e Sánchez prevese que xa non poidan xogar no que queda de tempada.

O Folgueiro, once xornadas invicto

O club de Boavista logrou a sétima vitoria do curso e mantense invicto nas once xornadas de competición. Derrotou 2-1 a un Cabreiros que tras o seu gran inicio, acumula tres derrotas consecutivas. 

O Folgueiro é 2º con 25 puntos, a un do Riotorto. Pola súa parte, o Cabreiros é 5º con 18. 

Os goles chegaron no segundo tempo, tras unha primeira metade de dominio local sen grandes ocasións. Oki desequilibrou o resultado ao marcar de penalti.

O Cabreiros, co marcador en contra, amosou as razóns que o levaron a parte alta da clasificación nesta tempada. Os visitantes, cun xogo moi vertical, lograron empatar grazas a Jordano. 

Con todo, superado o minuto 80 de xogo, nunha falta na frontal Oki anotou o segundo. Os locais pasaron a defender o perigo dun Cabreiros que o intentou ata o final. Joan dispuxo da mellor ocasión.

O Alfoz non deixa que lle leven puntos do Municipal

Sexta vitoria do curso para o club alfocense, que se mantén invicto na casa. Superou ao Pastoricense (3-2), e segue na parte alta da clasificación: a tres puntos do Folgueiro e a catro do Riotorto; dous equipos que xa pasaron polo Municipal e só puideron empatar. 

Pola súa parte, o Pastoricense fica na zona media da táboa con 17 puntos, a cinco do seu rival da pasada fin de semana. 

Os locais non saíron ben e o Pastoricense dominou. Nun córner púxose por diante por medio de Silvosa. Con todo, en apenas cinco minutos, o Alfoz logrou remontar. Dani Jiménez e Víctor foron os autores dos goles. Non se renderon os visitantes que lograron a igualada antes do tempo de lecer por medio de Kanu. 

Nos segundos 45 minutos, o Pastoricense controlou o xogo con balón, pero nunha acción a balón parado o Alfoz logrou o terceiro a través de Víctor. Nos últimos minutos encontro roto no que tanto puido chegar o cuarto local como o empate visitante. 

O Xermade mira cara arriba goleando e con hat-trick de Pedro

O club xermadés asinou a goleada da semana. Venceu con moita claridade a un Meira, que chegaba nunha gran xeira (7-0). É o cuarto triunfo da temporada para os locais, que se manteñen na zona media (17 pts.), a un punto precisamente do seu rival (6º). 

A pesar do resultado, a maioría dos goles producíronse no segundo tempo. O encontro comezou igualado e só o desequilibrou Chungui co seu tanto ao redor do minuto 40. 

O Xermade desatouse no segundo acto. Jose Adega anotou de penalti ao pouco de volver dos vestiarios. De seguido Sergio Vila, Pedro, Nando e novamente dúas veces Pedro, foron os goleadores nun resultado amplio. 

O Guitiriz volve gañar na casa

O club guitiricense superou ao Matela (2-0) e consolídase nesa zona media igualada. Suma 17 puntos, os mesmos que o Xermade e o Pastoricense. Pola súa parte, o Matela segue como último clasificado con tres puntos, a tres da salvación do descenso directo.

Os locais trataron de levar a iniciativa do xogo na primeira metade, pero custoulles xerar ocasións ante a boa defensa visitante. Antón e Tanke tiveron as mellores opcións do primeiro acto. O Matela puido marcar xusto antes do descanso. Jorge e Pablo estiveron a piques de facelo. 

Na segunda parte, os locais acabaron impoñéndose co acerto novamente de Labrada (oitavo gol en liga) e de Roi. Con todo, os visitantes non se renderon e volveron gozar dalgunha outra opción para marcar. 

O Celta Barreiros iguala na Mina

Cuarto empate da tempada do Celta Barreiros, que lle impide estar algunha posición máis arriba. Igualou 2-2 cun Sporting Pontenova que ocupa a 13ª praza con 10 puntos. Seis máis ten o Celta Barreiros que se sitúa nunha zona media moi igualada, pero a dez do líder. 

Ambos equipos acumularon chegadas ás áreas rivais. Quizais, unha lixeira superioridade local no primeiro tempo, que se viu recompensada co gol ao pouco de comezar a segunda metade. Óscar Amor definiu nunha acción colectiva. 

A ledicia na Mina durou uns dez minutos. Foi cando Congui logrou a igualada para os visitantes tras unha boa contra. A partir de aí, calquera dos dous conxuntos dispuxo dalgunha oportunidade para marcar o gol do triunfo, pero non chegou. 

Terceira vitoria en catro partidos do Casás

O conxunto capitalino superou por 3-1 ao Sanci. Suma a terceira vitoria do curso e unha máis ante un rival directo nesta primeira fase da liga. Aínda que non escala moitos postos, si sobe a diferenza coa zona perigosa. O Casás é 12º con 11 puntos, cinco máis que o antepenúltimo e seis máis que o seu rival, que marca a zona de descenso directo. 

Os locais fixeron unha boa primeira metade na que marcaron xa tres goles. Maira marcou un dobrete e xa acumula nove goles na competición. Tamén anotou Luis que suma seis en total.

Tentou recompoñerse o Sanci e o gol de Aleixo aínda na primeira metade deulle esperanzas. Seguíreno intentando na segunda, pero os locais tiveron o partido controlado. 

O Castroverde revive duelos do pasado para lograr a segunda vitoria do curso

O equipo da Veiga do Olmo derrotou ao Goiriz (4-3) nun encontro trepidante, a pesar de non estar o terreo de xogo nas mellores condicións. Os locais tiveron que mentalizarse de que o curso anterior na Terceira si foran quen de gañarlle ao Goiriz, xa que nesta campaña as diferenzas clasificatorias eran de 18 puntos en 11 xornadas. 

O Castroverde suma seis puntos e é antepenúltimo, a catro puntos do Sporting Pontenova, un posto máis arriba, e dous de diferenza co descenso directo que marca o Sanci. O Goiriz agora é 4º, a tres puntos do posto de promoción e a catro do líder.

Foi un encontro de alternativas. O Castroverde controlou o xogo na primeira metade sen grandes ocasións para ningún dos dous lados. Aínda así, os locais puxéronse por diante cun tanto de Gelo. Nun man a man, Eladio non erra e igualou o partido para o Goiriz. 

Tras comezar xerando perigo o Castroverde no segundo acto, foi Eladio quen volveu marcar e remontar momentaneamente o duelo. Xabi en área pequena rematou un balón que viña dunha falta lateral para igualar. 

Sen ser o mellor partido do Goiriz, ten potencial na zona de ataque e tamén picardía. Eladio, aos seus 39 anos, foi o máis listo para volver poñer aos seus por diante e asinar o hat-trick. 

Na recta final foi cando o Castroverde lle deu a volta. O capitán Richard marcou de penalti, tras falta a Gelo dentro da área. Xa no tempo extra, Coto de falta directa anotou o cuarto. 

O Becerréa volveu ao liderado con dous goles de Xairo e o Santa Comba é colíder

O club da Montaña protagonizou o gran partido da fin de semana ante o San Roque. Primeiro analizámolo en Futbolinlugo e despois cumpriu as expectativas nunha Polvoreira cunha gran entrada de público, a pesar do tempo, pero beneficiada polo horario. Ás 20:30 h era o único partido sénior masculino en xogo na provincia, xunto co Oural 0-3 Santaballés. 

O horario tamén deu pé a que o porteiro do San Roque Manu Cedrón chegara para xogar. O tamén adestrador de porteiros do Bergantiños cumpriu coas súas funcións no Couto e chegou a tempo para vestirse de curto cos seus compañeiros do cadro verde. 

O Becerreá logrou un triunfo de peso xusto ao final (1-2) e regresou ao primeiro posto. Conta agora con dous puntos de marxe con respecto ao seu rival. Iso si, o Santa Comba pégase a el dende o 2º posto e tamén con 25 puntos. 

O partido foi moi desputado. Iso si, o Becerreá sorprendeu para marcar ao pouco de comezar por medio de Xairo cun golazo estando o futbolista de costas a portería. Cedrón evitou o segundo cunha boa parada ante Kevin. O San Roque xerou ocasións, pero non foi capaz de igualar no primeiro tempo. Jul, Yelko e Tsotne estiveron preto do gol. 

No segundo acto, si chegou ese tanto por medio de Jul. Nun segundo tempo máis bronco as ocasións foron a menos, pero impúxose o acerto e a calidade visitante. Sito asiste na frontal da área e Xairo rematou á cepa do poste. 

O Santa Comba alcanza postos de promoción de ascenso por primeira vez na tempada ao vencer ao San Lázaro (2-0). Acumula 25 puntos e conta con dous de marxe co San Roque e cinco con respecto ao Lemos B, Ferreira e o Monterroso B. Pola súa parte, o San Lázaro segue fóra do descenso directo ao non gañar ningún dos seus rivais directos: é antepenúltimo con dous de marxe co Sober.

O San Lázaro foi mellor no primeiro tempo, pero perdoou o gol. Ata tres ocasións claras xeraron os pupilos adestrados por Manel. 

No segundo tempo, o xogo foi máis trabado. Desequilibrou o resultado un penalti favorable aos locais que marcou Álex Ferreirós. Ao pouco o Santa Comba logrou o segundo por medio de Jano. 

O Lemos B suma credenciais ante o Antas

O filial lemista superou ao club do Castro Seoane (0-3) e tamén na clasificación. Agora é 4º con 18 puntos, un máis que o seu rival (8º). A igualdade é máxima nesa zona da clasificación con cinco equipos nun punto. 

A solidez defensiva do Lemos B casou ben coa eficacia ofensiva. Encontro moi serio que foron madurando e no que marcaron dous goles na recta final do primeiro tempo. Adrián e Roberto foron os autores. 

No segundo acto, o Antas deu un paso adiante, pero tampouco logrou poñer en demasiados apertos a defensa visitante. Os locais controlaron o xogo por medio de posesións longas, gozaron dalgunha oportunidade para sentenciar, pero o terceiro non chegou ata case o final. Marcouno Cere. 

O Ferreira gaña no seu mellor momento da temporada

Os xogadores preparados por Manu enlazaron o terceiro triunfo seguido ante o Sober (0-2). Os locais non perderan en 2025 en Centeás. Os tres puntos colocan ao Ferreira na 5ª posición con 18 puntos, mentres que o Sober segue en descenso con seis puntos. 

Foi un encontro igualado no que o Ferreira se adiantou cedo. O Sober mellorou e puido igualar no segundo tempo. Con todo sobrepasado o minuto 70, os visitantes montaron un contragolpe rápido e lograron o segundo tanto.

O Portomarín logra a primeira vitoria no Chao da Poza – Marcos Arias

Tarde de emoción en Portomarín coa homenaxe que club e concello lle realizaron a Marcos Arias, o que fora xogador, presidente e unha das álma máter do club, logo do seu falecemento hai uns meses. O Monterroso B tamén se sumou a ese recoñecemento. 

Os locais foron moi superiores no encontro, tras desequilibrar o resultado mediada a primeira metade por medio de Moaad. Ao pouco de comezar o segundo tempo Caloto marcou o segundo. Juanillo logrou a sentencia antes do minuto setenta.

Trío de vitorias do Chantada B, Páramo e Sarriana B na zona media baixa

O filial chantadés superou ao Páramo (3-0) e acumula 12 puntos na clasificación. Os locais adiantáronse cedo cun penalti transformado por Brais. As forzas equilibráronse e O Páramo tivo opcións para empatar.

Con todo, no segundo tempo o Chantada B aproveitouse de que os visitantes adiantaran liñas. Ao contragolpe sentenciou o partido con dous goles de Manu.

O Paradela tamén suma doce puntos tras gañarlle ao Friol (0-3). Foi un encontro intenso no que os locais pagaron caro os erros defensivos. Ao descanso o Paradela gañaba por 0-2.

O Friol no segundo tempo tivo opcións para recurtar diferenza, pero foron os visitantes os que sentenciaron á contra.

A Sarriana B logrou a súa ansiada vitoria ante o Palas (3-0). Terceiro triunfo do curso, logo de cinco derrotas seguidas. O filial de Sarria suma dez puntos, catro menos que o seu rival.

Os pupilos preparados por Raúl amosaron a súa mellor versión. Rubén marcou un dobrete e Xoel sentenciou cara o final.