A Sarriana culminou a fazaña e será o representante do fútbol galego na fase final nacional tras eliminar ao Estradense nunha eliminatoria na que foi superior en ámbolos dous encontros. Os de José Antonio Rodríguez, no segundo ano na Terceira RFEF na súa historia, pelexarán fronte ao Atlético Pulpileño, conxunto almeriense, límitrofe coa comunidade murciana, na que compiten. Este conxunto xa fora rival do Racing Vilalbés na fase de ascenso en 2018.

O encontro comezou como era previsible. O Estradense quixo ter o dominio do choque e buscar un gol que o metera na eliminatoria o antes posible. Os locais optaron por unha presión alta que provocou que a Sarriana non puidera xogar como está acostumado e tivera que buscar un fútbol máis directo. Gamarra e Porrúa foron os primeiros en inquedar a Pirot. Boedo respostou obrigando a intervir a Coke.

O encontro, malia ter gastado menos de media hora, entrou nunha fase decisiva. O Estradense gozou da mellor ocasión para adiantarse. Jacobo cometeu penalti sobre Jaichenko e o propio extremo foi o encarado do lanzamento. Pirot, decisivo, detivo o lanzamento. Pouco despois, os de Manuti quedaron cun home menos ao ver Gamarra o segundo cartón amarelo tras unha falta cometida sobre Maxi. A decisión foi moi protestada polo Estradense.

En superioridade, a Sarriana xogou a placer e non tardou en chegar o gol. Diego Rey asociouse con Azael e este colocou un preciso balón para que Boedo empurrase ao fondo da portería. Antes de que chegara o intermedio, os lucenses sentenciaron. Un bo pase de Jacobo para Álex Millán aproveitouno o atacante para superar a Coke na súa saída.

O segundo tempo tivo pouca historia. O Estradense non decaeu no seu empeño de cando menos meterse no partido, pero non estivo atinado nos seus achegamentos. A boa labor de Maxi e Vilela no centro da zaga impediron varias situacións de perigo. A Sarriana non gozou de demasiadas ocasións ata o tramo final. Guitián e Santi Gegunde puideron ampliar as diferencias.

Foto de portada: Mundito Carballo Durán.