A Sarriana enfróntase a unha cita histórica ante o Estradense na final do play off galego de ascenso á Segunda RFEF. É a primeira vez que o conxunto sarriao chega a estas cotas da Terceira RFEF e de pasar estaría a unha eliminatoria de alcanzar unha división na que nunca estivo. Todo tras avanzar de rolda nun derbi provincial ante o Rácing Vilalbés de infarto que decidiu a posición en liga debido a que a eliminatoria quedou empatada ao rematar a prórroga.

Un dos bloques de contención que ten a Sarriana dentro do centro do campo é un Brais Prieto que demostrou a súa capacidade de traballo na volta na Ribela. O mediocentro pasou polos micrófonos do Ser Deportivos Lugo desta semana e enfrontáronse ás preguntas de Sara Meijide, presentadora do programa, e Eros López, redactor de Futbolinlugo. Na entrevista falaron da anterior eliminatoria, dos perigos do Estradense e a falta da vantaxe de campo.

Eliminatoria ante o Rácing Vilalbés: «O corazón xa volveu no seu sitio pero o encontro foi de infarto, tocounos sufrir moito pero a Sarriana puido avanzar de rolda».

Falta da vantaxe de campo: «Eu creo que ao final é unha lixeira vantaxe pero por exemplo o outro día puido ser batida se o Rácing Vilalbés marcara algunha das opcións que tivo ao final. Somos un equipo moi ofensivo e penso que cando quedan poucos minutos o propio xogo condiciona todo e unha ocasión pode cambialo todo. A volta fóra da casa non é un condicionante para ter en conta dende o primeiro momento».

«Para que a Sarriana gañe non podemos cometer erros»

Perigos do Estradense: «O Estradense é un equipo moi complicado que nos pode xerar problemas coa súa presión alta. Nós que saimos xogando non podemos cometer erros para que non transicionen porque na parte ofensiva teñen moitas armas. Todo pasa por estar seguros e ser fieis ao noso estilo aproveitando as que teñamos para marcar».

Guión do encontro: «Eu penso que o guión vai ser o mesmo porque na anterior eliminatoria mantiveron a súa liña. Intentaremos non empezar como nos de liga que arrancamos perdendo pero eu creo que o partido pode ter o mesmo tono. Con que rematen igual firmo».