O Goiriz converteuse nesta xornada no primeiro equipo do fútbol lucense en ascender de categoría. Os pupilos de Veiga acadárono tras unha vitoria ante o Matela por 0-2 na que Cornide e Héctor Moure foron os heroes do ascenso. Todo tras unha tempada excelsa na Terceira Futgal con 15 victorias, un empate e unicamente unha derrota. Ademais, as estatísticas falan de que o Goiriz foi o conxunto máis goleador, 66 tantos a favor, e o que menos encaixa xunto co Castroverde, 15 goles.

Un Goiriz marcado polo traballo e a continuidade

O conxunto que comezou a dirixir esta tempada Manuel Veiga, da man de Cora, que estivo no cargo durante varios anos no clube, mantivo unha identidade clara de proxecto. «O equipo xa estaba feito e metín unhas ideas que aceptaron perfectamente. A suma de varias cousas xa deu a consecuencia do ascenso«, afirmou o técnico. Ademais, apuntou que a chave foi «moito sacrificio e traballo. Tanto nos adestramentos coma nos partidos o equipo nos daba todos.

Os xogadores tamén apuntaron que «o grupo foi primordial por subir e o compromiso de todos foi a clave para poder conseguir o ascenso. Non tivemos momentos malos ao longo do ano», afirmou Vizoso. Muñiz, quen logrou ascender co seu pai Manel, capitán do equipo e dono da banda esquerda, apuntou á «continuidade no proxecto do ano pasado cambiando o ciclo de anos anteriores. Non se dera conseguido o ascenso e cun par de pezas novas acadámolo». Tamén puxo en valor que ascender co seu pai e no equipo da súa vida é «todo un orgullo«.

Un encontro que reflectiu o que foi o curso

Todo ascenso ten un momento álxido e o do Goiriz foi a vitoria ante o Matela. Veiga transmitiu que «ao longo do encontro notouse que o ascenso estaba preto e foi un partido moi complicado. Tiñamos fallos que non temos normalmente pero polo feito de que o tiñamos na cabeza». Vizoso sumou ao seu adestrador que «levamos facendo contas varias xornadas pero sabíamos que estabamos preto. Tivemos encontros serios e este sacámolo con bastante solidez«.