O Trío de Ases O Cantón desta xornada déixanos o empate do Racing Vilalbés na Madalena fronte ao Compostela na Segunda RFEF. Resístese a vitoria dos chairegos que caen a posto de descenso. Na Terceira RFEF, o Viveiro acadou un triunfo en Somozas que o saca de descenso mentres que o Polvorín sumou un valioso punto no campo do Arousa. A Sarriana caeu na Ribela diante do Estradense. Na Preferente, a Residencia acadou tres puntos moi importantes no campo do Montañeros no encontro de despedida de Dani Galán, novo adestrador do Polvorín. O Ribadeo venceu no Pepe Barrera ao Victoria, mentres que o Lemos non puido sumar no campo do Lalín e o Castro perdeu con claridade no Arturo Pereiro co Dubra.
O Racing Vilalbés suma un punto diante do Compostela na Madalena (0-0)
Empate sen goles do Racing Vilalbés que deixa aos chairegos en postos de descenso por primeira vez na temporada. A falta de eficacia cara a porta contraria privou aos de Simón Lamas dun mellor resultado fronte a un Compostela chamado a pelexar polo ascenso. Nada máis comezar o partido Rares tivo a ocasión máis clara do partido, pero o disparo do atacante encontrose coa boa parada do ‘Pato‘ Guillén. O propio Rares tivo outra boa ocasión nun primeiro tempo no que os visitantes tiveron o dominio do balón, aínda que sen profundiade para xerar perigo ante a portería dun Álex Santomé ao que só inquedou un disparo desde a frontal de Hugo Matos.
A segunda metade seguiu unha tónica similar na que o Racing Vilalbés estaba máis preto do gol que un Compostela que non era quen de desenmarañar o entramado defensivo local. Uzal contou cunha boa ocasión cun remate de cabeza que marchou fóra por pouco.
A Sarriana colleita a segunda derrota consecutiva fronte ao Estradense (1-2)
Encontro con moito ritmo nunha boa primeira metada da Sarriana. Malia todo as ocasións non foron excesivas. Jacobo, a servicio de Tijan, rematou alto, e Keko rematou ás mans do porteiro. O Estradense achegouse con certo perigo nunha ocasión nos primeiros corenta cinco minutos nos que os de David Páez estiveron intensos, aínda que con dominio de balón dos sarriaos.
O segundo tempo comezou ben para os de Jorge Cuesta. Sané rematou ao fondo da portería un bo servizo de Diego Rey. Só tres minutos durou a ledicia na Ribela. O Estradense igualou tras un erro na saída de balón dos locais. O disparo de Migui desde a frontal resultou imparable para Javi Liz. O encontro entrou nunha fase na que non existiron ocasións ata que a falta de dez minutos Elías cun disparo desde fóra da área deulle o triunfo ao Estradense. Tentouno a Sarriana ata o final e tivo unha ocasión de Cuadrado, pero o resultado non se moveu.
O Polvorín sumou un punto no campo dun Arousa impreciso (0-0)
Empate moi positivo o colleitado polo filial albivermello na Lomba diante dun rival esixido clasificatoriamente na procura dunha primeira praza que se lle presume complexa. O cadro arlequinado levou a iniciativa na primeira parte e contou con boas ocasións para poñerse por diante no marcador. Sylla en dúas ocasións e Borja Míguez tiveron as máis claras. Fernando e o pao evitaron o tanto dos locais. O gardameta lucense tamén foi decisivo xusto antes do intermedio nunha boa opción de gol do ex fabrilista Iñaki Leonardo.
No segundo tempo o encontro seguiu o mesmo guión, aínda que aos de Luisito costoulles máis xerar ocasións de perigo. Rubo e Concheiro tiveron sendas oportunidades, pero a máis clara do periodo final foi para o Polvorín. Cando o encontro xa esmorecía, Lansade no man a man fronte a Manu Táboas estrelou o balón no pao.
O Viveiro vence no desconto ao Somozas e sae de descenso (2-3)
Terceira vitoria dos mariñáns nas últimas catro xornadas. O Viveiro camiña con paso firme cara a permanencia tras vencer no sempre difícil campo do Somozas. A primeira metade estivo marcada polo forte vento que soprou a favor do ataque dos locais. Malia este factor, ámbolos equipos foron a vestiarios sen que ningún tivera ocasións de gol.
Na segunda metade o Viveiro exerceu unha presión máis alta e deulle os seus froitos. Aos dez minutos da reanudación adiantouse no marcador cun tanto en propia porta de Joel. O ex fabrilista Cambón igualou o encontro a falta dun cuarto de hora para o final, pero Diego Núñez volveu poñer por diante ao Viveiro. Xa co tempo cumprido Mosquera empatou, pero o Viveiro non dixera aínda a súa última palabra. Nunha contra Gamarra superou a Paco cun bo tiro cruzado.
O Ribadeo vence ao Victoria e sitúase na zona cómoda da clasificación (2-0)
Segunda victoria consecutiva como local para un Ribadeo que se acomoda na zona media da clasificación. Non comezou ben o encontro o conxunto local, nun primeiro cuarto de hora no que o Victoria era vencedor nos duelos. Co paso dos minutos, o Ribadeo fíxose co dominio do encontro e en catro minutos deixou o encontro encarrilado. Ámbolos dous goles chegaron dun xeito moi similar. Servicio de Castrín desde o perfil esquerdo do ataque e remate ao fondo da portería de Álex Meitín.
Na segunda metade o Victoria foi superior. O Ribadeo apenas tivo o balón e o cadro coruñés amosou un bo ritmo de xogo que propiciou que metera en apuros a un Ribadeo que soubo defender a súa renda.
Derrota do Lemos na súa visita ao campo do Lalín (2-0)
O Lemos non puido sumar nun dos feudos máis difíciles da Preferente, o Manuel Anxo Cortizo. O cadro monfortino saiu ben ao campo e buscou xerar perigo á contra. O Lalín medrou co paso dos minutos e aproveitou as accións a balón parado para poñerse por diante. Nunha falta evitable cometida polo Lemos, Borja Casal fixo o primeiro para os locais. Nos últimos minutos do primeiro tempo o dominio foi alterno e non se viron ocasións de gol.
No segundo tempo o Lemos chegou á área rival aínda que sen xerar excesivo perigo. Os de Juanlu Bernal reclamaron un penalti na área lalinense que o colexiado non sinalou e na seguinte xogada o Lalín sentenciou o choque nunha contra que finalizou Borja Casal. Os locais controlaron os últimos intres sen que o Lemos puidera inquedar a portería de Peti.
Unha moi mala primeira metade castiga ao Castro fronte ao Dubra (0-3)
A sexta derrota consecutiva do Castro deixa aos chairegos a un só punto dos postos de descenso. Primeira metade para esquecer no Arturo Pereiro na que o Dubra deixou o encontro visto para sentencia. O Castro non conseguiu entrar no partido en ningún momento e os visitantes acadaron tres goles por medio de Brais, Álvaro Varela e Iker.
Na segunda metade o Castro estivo mellor, pero falto de ideas para poder xerar perigo a un Dubra que defendeu sen dificultades o marcador colleitado antes do intermedio.
A Residencia vence no campo do Montañeros e sae de descenso o día da despedida de Dani Galán (1-2)
Cuarta vitoria nos últimos cinco encontros para unha Residencia que saiu moitas xornadas despois dos postos de descenso. E este triunfo tivo un significado especial ao coincidir coa despedida de Dani Galán, novo adestrador do Polvorín.
Encontro marcado pola continua choiva e vento que dificultou o xogo de ámbolos conxuntos. A Residencia tivo o partido controlado diante dun rival chamado a estar na zona alta da clasificación. Edrosa, cun remate desde dentro da área e Gabri, que obrigou a intervir a Guillermo, tiveron as ocasións máis claras do primeiro tempo para os lucenses. Pero xusto antes do descanso, o conxunto local adiantouse no marcador nun claro penalti que transformou Pape.
No segundo tempo o encontro seguiu a mesma liña. A Residencia tivo o mando e o Montañeros só foi capaz de xerar perigo nalgún saque de banda colgado á área. Os goles chegaron no último tramo de encontro. No minuto 82 Rober de tiro cruzado superou ao porteiro coruñés e moi preto do 90 o Montañeros quedou con dez por expusión con cartón vermello directo de Pape por escupir a un xogador da Resi. Só un minuto máis tarde, unha parede entre Pereira e Rober remata co gol deste último, tanto que lle outorga tres puntos vitais aos lucenses.
