A sanción fíxose esperar pero foi exemplar. Na tarde deste xoves, a Real Federación Española de Fútbol comunicou a inhabilitación por un ano da adestradora do PM Friol Covi Regueiro. Así como unha multa de 602 euros á citada técnica e de 301 euros ao seu club por «permitir e amparar a actitude da súa adestradora».

O club intentou á desesperada impedir unha sanción sobre a que estaba máis que avisado. O presidente da entidade Geluco Villar alegou que os distintos comportamentos de Covi Regueiro no derbi ante o CD Lugo eran parte das funcións desta última. Baseouse en que o feito por Covi na Cheda estaría permitido ao ser esta a «coordinadora e responsable de prensa do club» e estar realizando ditas funcións.

Esta vaga xustificación vén acompañada dunha nova pataleta, para botar de novo balóns fóra contra terceiros e desviar a atención do importante. O presidente manifesta que «non entende como non se reflicte na acta que ambos equipos non poidan realizar exercicios de quecemento dentro do terreo de xogo, que non se axuste fielmente a hora de inicio do partido e non se reflicta a prensenza de outras persoas que non figuran na acta e accederon ao terreo de xogo», sinala a comunicación da RFEF.

Como xa dixemos, os argumentos do PM Friol quedaron en balde. Multa para club e adestradora acompañada de un ano de inhabilitación para Covi Regueiro. Aos que habería que engadir posteriormente os 42 partidos de sanción anteriores que xa arrastraba.