Tres dos catro subgrupos da Segunda Rexional xogaron partidos aprazados na pasada finde. Logo dos encontros disputados na zona norte, subgrupo 1B, o Meira proclamouse campión matematicamente.
Na zona norte, subgrupo 1A, xogáronse dous duelos supendidos na xornada nove. O Celta Barreiros igualou ante un Roupar no que Edi se colocou baixo paus. É a primeira vez en encontro oficial que o xogador experimentado das Somozas tivo que exercer na portería. E cumpriu con creces no Cascabeiro. Pola súa banda, o duelo directo entre a Candelaria e o Xermade resolveuse do lado do equipo da Rúa que se achega máis ao cuarto posto.
Neste subgrupo aínda queda un partido máis para poñerse ao día. O Roupar ten que xogar contra o Sanci. En principio está previsto para a finde do 13 de febreiro. A falta de tres partidos para chegar ao final da 1ª fase, o Cabreiros lidera a clasificación con catro puntos de marxe sobre o Celta Barreiros (na última xornada xogan entre si). Sanci e Iberia con 18 e Candelaria con 16 semella que son os que van pelexar por entrar na zona de privilexio. Só unha especie de carambola lle daría opcións ao Xermade e ao Roupar de chegar ao cuarto posto.
Na zona norte, subgrupo 2B, o Meira confirmou o seu primeiro posto sen xogar. Os pupilos preparados por Ramón Labrada confirman o liderado con tres xornadas por diante nas que poden preparar a conciencia a segunda parte do campionato. Con 26 puntos, unha única derrota e sen ningún rival que lle fixera fronte na clasificación, o club meirego cumpre, de primeiras, coas argumentadas expectativas que tiña postas.
Nesta finde, o Cospeito recuperou o seu duelo coa Fonsagrada que rematou en empate. Pola súa parte, o Guitiriz superou no Municipal ao Abadín. Ao equipo abadinense incorporouse nas últimas semanas o porteiro Manu Balsa, coñecido como ‘Hulk’ na súa estadía no Nuevo Nausti. Xa debutou co equipo aínda que non foi da partida ante o Guitiriz. Ademais tamén igualaron a un gol o Muimenta e o Matela. Os dous goles no Pichón foron de penalti, o dos celestes marcado no tramo final.
Neste subgrupo todos os equipos están agora ao día. A loita polos tres postos restantes de privilexio prevese moi competida ata o final. Cinco puntos separan ao Cospeito (2º) coa Fonsagrada (7º). O único equipo que non ten opcións de chegar ao cuarto posto é o Abadín que loitará pola salvación na 2ª fase.
Na zona sur, subgrupo 2A, houbo xornada habitual ao ser máis equipos e quedan máis partidos por xogar. A SD Becerreá continúa asegurando o seu primeiro posto. Derrotou pola mínima ao Palas e está a piques de confirmar pasar como líder de cara a 2ª fase. A praza para loitar polo ascenso xa a ten asegurada. Nove puntos de diferenza son os que o separan co Paradela (2º). O equipo preparado por Rubén Bergantiños igualou a un gol ante o Antas.
O Páramo mantén a 3ª posición a pesar de non xogar o seu partido co Sporting Lucense. Situación que aproveitou a Milagrosa para meterse no 4º posto ao vencer ao Corgo.
Na zona sur, subgrupo 2B, apértase a zona alta logo de xogar os partidos aprazados. O líder Ferreira igualou a dous goles co Chantada B. Neste grupo aínda quedan catro encontros e o Ferreira supera nun punto ao Río Sil. O conxunto da Carqueixa derrotou ao Oural nun duelo directo con sete goles.
O Oural (3º) está a cinco do líder e ten pendente de xogar o duelo aprazado co Chantada B (5º). É un partido directo porque tres son os puntos que os separan. Está previsto que se xogue na finde do 20 de febreiro.
Pola súa banda, o Incio derrotou ao Quiroga e métese de cheo na pelexa pola cuarta praza. Urdi destacou cun dobrete. O conxunto amarelo queda a dous puntos do Brollón. Os máis descolgados do cuarto posto son o Bóveda (a seis puntos) e o Quiroga (a nove puntos).
