Tódolos anos hai un gran animador do mercado. Ou varios. Pero este ano, o Pol lévase a palma. O cadro do Manuel Luna vén de confirmar dúas fichaxes para reventar a Primeira Galicia. Ambas en liñas claves. A portería estará ben gardada por un clásico da provincia. José Bruzos deixa Foz para recalar no ambicioso proxecto comandado por Alberto López. A el unirase un dianteiro, vello coñecido do técnico lugués. Mauro Busi é un xogador máis dos que cambia Sarria por Pol. A súa carta de presentación: 26 goles nas súas dúas últimas campañas en Preferente. Non serán as últimas incorporacións. De feito, nos próximos días farase oficial un dianteiro xove pero contrastado na Preferente.
Nesa mesma categoría, o Outeiro será unha temporada máis candidato ao ascenso. Iso si, non poderá contar con Varo e Adrián Román. Causan baixa ao igual que a xa comentada do meta Brais Lombao, agora no Abadín. O resto do cadro de xogadores será moi similar, á espera de fichaxes, xa que preto do 90% de xogadores renovou. Ademais, o Portomarín, asegurou a continuidade de Troulo ao mesmo tempo que incorpora un novo elemento ao seu staff técnico. Alberto, exsegundo adestrador da Sarriana e técnico na base do Lugo, será a man dereita de Fernandito no cadro miñoto.
Máis ao sur, o Chantada segue un ano máis cos servicios de Manuel e Jordi así como Dieguito e Sergio. No cadro feminino, renova Ángela e a gardamallas Sandra. Pola súa parte, os veciños do Atlético asegúranse o gol co monterrosino Pardo e manteñen tamén aos capitáns José e Dani. Moi próximos á vila chantadina, atópase o Carballedo na Terceira Galicia. Club que contará de novo co veloz Noé.
Por último na Terceira División, contamos dúas incorporacións sonadas. O Viveiro reforza o seu lateral esquerdo con Pablo Rey, destacado xogador nas últimas campañas no Polvorín. Competirá polo posto co canteirán Pablo Louzao. E no Rácing Villalbés, ilusiona a fichaxe de Dani Pedrosa. O ribadense regresa á provincia dende a UD Ourense para formar unha dianteira prometedora cun socio complementario como o goleador Fernando ‘Jhon Cuadretti’.
