A novena xornada trouxo cambio de líder no grupo norte e unha redución das diferenzas na cabeza da zona sur. O Folgueiro aproveitou a única derrota ata o momento do Guitiriz para colocarse primeiro e demostrar que é o equipo máis en forma da categoría. Ademais, a xornada recuperou a un dos goleadores de sempre e engadiu a un gardamallas de luxo para a división.
No grupo norte, o Folgueiro derrotou ao Goiriz, enlazou o oitavo triunfo consecutivo e ascende ao primeiro posto da táboa clasificatoria. O conxunto adestrado por Anxo é o terceiro equipo menos goleado da liga, en parte grazas ao traballo do seu porteiro Javi que polo momento non se perdeu ningún encontro. O liderado do cadro do Vicedo tamén vén dado pola primeira derrota do curso do Guitiriz. O conxunto adestrado por Delfín Romero non puido co Lourenzá nin tampouco co hat-trick de Iván Recalde. Continúa en postos de ascenso directo o cadro guitiricense, pero igualado a puntos cun Xermade que volve unir unha boa xeira ao vencer no Árbol ao Valadouro nun bo choque dos dous equipos. Diego Pellón puxo por diante ao seus (ían 1-1) cunha boa acción individual e Chungui anotou o último gol dende o medio campo. Tamén nun bo momento continúa o Roupar que derrotou a un Meira que fallou un penalti cando o marcador aínda non se movera e acabou pagando a súa falta de acerto.
Nese punto rómpese nestes intres a clasificación, xa que o seguinte en aparecer é o Cabreiros que venceu á Candelaria, siginificando así, o primeiro triunfo de Abel Rochela como adestrador. Aínda así, a Candelaria remontou o tanto inicial dos locais para posteriomente ser o Cabreiros quen volvese remontar cun dobrete de Borja Pellón. Despois de tres xornadas perdendo, o Mondoñedo volveu gañar, deixando así ao Cervo como novo pechacancelas do grupo. Iso que o cadro mindoniense quedou cun menos moi cedo pola expulsión de Lorigados. O equilibrio de xogadores chegou na segunda metade cando Miguel Gomes do Cervo recibiu o segundo cartón amarelo. Nesa zona baixa destaca tamén o triunfo do Abadín a domicilio ante a Comercial e a primeira vitoria da campaña para o Cospeito ante o Iberia. O cadro de A Fonte recuperou o valor diferencial de Nano que marcou dous dos tres goles do seu equipo.
📝 @Viusky1 ficha no @Portomarincf
O gardamallas seguirá compaxinando as funcións de adestrador de porteiros no @racingvillalbes. Finalizou o seu periplo no @RibadeoFC onde estivo pola ausencia dos porteiros do cadro da Mariña#DiarioDunMercado
— Futbolinlugo (@futbolinlugo) November 3, 2018
No grupo sur, o Guntín segue como líder pero só cun punto de vantaxe despois de empatar na súa saída ante unha SD Becerreá que recuperou sensacións e na que os xuvenís Santín, Javichu e Jose Lexo guiaron ao equipo. En zona de ascenso directo tamén está o San Roque que mantén a súa regularidade e impúxose con claridade no marcador ao Sporting Lucense con cadanseu dobrete de Borja Álvarez e Yaguito Valdés. A dous puntos sitúase o Palas que perdeu ante un Oural que uniu o seu segundo triunfo seguido e medra na clasificación. Coa mesma puntuación está o Bóveda que foi superior ao filial do Monterroso. Os dous inmediatos perseguidores son o Corgo e o Chantada B que colleitaron cadanseu empate. O Corgo na súa visita ao Brollón nun final trepidante cunha expulsión e un gol para cada equipo. O filial do Chantada nun dos duelos da parte alta da xornada ante un Portomarín ao que non lle chegou coa súa última incorporación, o gardamallas Viusky, para volver ao camiño da vitoria. O porteiro vilabés evitou o segundo e os locais aproveitaron para empatar ao final. Entre os dous equipos está o Ferreira que venceu ao Santa Comba nun enfrontamento no que primeiro o Ferreira errou un penalti e no que o cadro adestrado por Diego Mejuto tamén desaproveitou oportunidades claras.
Na metade da táboa atópase o San Lázaro logo de igualar nun encontro de seis goles co Incio. O equipo adestrado por Ángel Merino é o rei do empate nestes momentos da categoría con seis partidos finalizando con ese resultado. O Incio empatou o duelo nos últimos instantes grazas a un penalti marcado por Raúl Leizán. Sporting Lucense e Monterroso B continúan ocupando os postos de descenso directo.
