Un reforzado PM Friol B cae de novo ante o líder

Ante a ausencia de xornada na Terceira RFEF, o PM Friol B era o noso máximo representante nesta última data. E impúxose a lóxica nas Eiroas. O líder Bergantiños superou a un filial amarelo, que se mantén en descenso a Segunda Galicia unha semana máis.

As de Geluco Villar, coa axuda das xogadoras en dinámica do primeiro equipo e sen Covi Regueiro, plantexaron un partido complicado ao equipo de Carballo. Pilar sostivo ás lucenses nun primeiro acto na que o Bergantiños tivo a pólvora mollada.

Na reanudación, o triple cambio local obtivo o efecto desexado. Aos dez minutos da segunda metade, as de Gueli Cotelo xa vencían por 2-0. Neylla Thymote, a mellor do filial friolés en ataque, recurtou diferenzas. Foi unha efímera ilusión. O oficio do Bergantiños pechou o encontro. E o ‘dobrete’ de Cruz Sánchez puxo a guinda noutra tarde que non será recordada polas terras do queixo e o Pan de Ousá.

O Antas desátase na reanudación e o San Roque paga unha peaxe moi cara polo seu empate na segunda galicia

Un Antas de menos a máis goleou despois do paso polos vestiarios ao Xallas. As imprecisións e interrupcións marcaron unha primeira metade sen dominador. O cadro de Dani Abelairas adiantou liñas no segundo tempo e empezou a chegar a área contraria con moita facilidade.

Nuria abriu o marcador nunha falta de longa distancia. Elisa topouse co longueiro tras outro golpeo de falta. Foi a antesala dun novo tanto de Nuria, esta vez nun rexeite. Paula e a propia Nuria pecharían a goleada.

O San Roque sumou un punto na súa visita ao Carral. Iso foi o de menos. O partido quedou nun segundo plano despois da grave lesión de Patri na escadra verdibranca. Todo fai indicar que tería roto o ligamento cruzado! No relativo ao xogo, o encontro non tivo ocasións claras. O San Roque pisou máis campo contrario co seu rival e volveuse topar cos paus.

Nuria Louzao, autora dun hat trick para o Antas

As de Quiroga adiantáronse no marcador nunha boa acción de ataque posicional, culminada cun desmarque de ruptura de Saray. De tódolos xeitos, un erro na saída de balón propiciou o empate final. As capitalinas non lle puideron adicar o triunfo á súa compañeira Patri e agardan facelo a vindeira semana ante o Brexo Lema.

A Milagrosa mostrou unha gran actuación coral, con final infeliz ante o Cultural Maniños. Cinco minutos fatídicos penalizaron ás branquivermellas, que ofreceron unha versión mellorada con respecto a partidos anteriores.

O Chantada segue sen coñecer a vitoria na presente tempada. O equipo de Jorge González mantense no último posto da táboa despois de caer con claridade ante o Touro. O equipo de Xanzy aproveitou a falta de contundencia defensiva das lucenses. O Chantada baixou os brazos desde o 4-1 e o Touro redondeou un gran partido.

O CD Lugo B deixa os primeiros puntos do curso e o San lázaro leva o derbi das gándaras

O Derbi das Gándaras tivo un marcado centrocampismo. **RÓBER CARREIRA**

O CD Lugo B non pasou do 0-0 inicial ante o líder da Terceira Galicia. As de Diego Rey controlaron en todo momento o choque e non concederon máis que dous balóns parados. Candela non atopou porta en dúas boas ocasións na primeira metade. E na reanudación mantívose a pólvora mollada para as albivermellas. O Bandeira perdeu tempo ante un filial capitalino que viu como Ánxela e Ainara queimaron as últimas balas sen sorte algunha. O CD Lugo B deixa así os primeiros dous puntos da tempada.

Un San Lázaro, con once xogadoras xustas, logrou o triunfo nun Derbi das Gándaras moi plano. O centrocampismo mandou sobre as ocasións. E un solitario gol de Anita bastoulle ás de Luchi para conseguir a vitoria. As da Ponte amosaron unha liña ascendente ante unha Comercial organizada e combativa a pesares de que se descompuxo algo despois do gol.

Importante remonta do Monte Forte ante un combativo Rois. A falta de gol lastrou ás de Cristian Penas na primeira metade. A cousa empeorou despois do paso polos vestiarios. Un gol a balón parado puxo o 1-0 no marcador. Tocou remar contracorrente. Paulita vestiu o chaleco salvavidas e deulle os tres puntos ás monfortinas cun ‘dobrete’ no último cuarto de hora.

O gol de Jenny valeu tres puntos para o Carballedo. CARBALLEDO CF

O Carballedo asinou un triunfo pola mínima, moi escaso tralo visto no Castro Ventos. As de Sementa dominaron de principio a fin a un organizado EF Silleda. Dispuxeron de infinidade de ocasións para golear. Pero tiveron que conformarse cun solitario gol de Jenny á volta de vestiarios. Iso si, sempre se xogou ao que quixo o centro do campo das Guerreiras, especialmente ao ritmo marcado por Belén e Sara. Cuarta vitoria consecutiva do equipo de Sementa.