PM Friol – Athletic B, o destino de xogar a 50 km das túas raíces

Fotos: Athletic Club

A Reigosa inaugura este domingo a segunda fase da Reto Iberdrola. O PM Friol recibe ás 12:00h a un dos clubs modelo polo seu xeito de entendelo fútbol. Chega o filial do Athletic Club. No conxunto vasco dáse unha desas historias da emigración que xa traspasa xeracións.

Roberto Pampín López (05-01-1984, Arrigorragia – Bizkaia) é o actual adestrador do Athletic Fem B. Fíxose cargo do equipo a comezos de xaneiro. Xusto cando a ata daquela adestradora do filial, Iraia Iturregui, asumiu o cargo no primeiro equipo. Pampín xa levaba uns anos dirixindo ao conxunto cadete de Lezama.

Se botades a vista atrás, igual vos lembrades da estrea de Roberto co primeiro equipo. Si, Roberto foi porteiro, criouse na base do Athletic de Bilbao e chegou a debutar da man de Ernesto Valverde. Nada máis e nada menos ca nun derbi ca Real Sociedad en 2004.

O soño cumprido dun neno. Un soño que igual era similar ao do seu aita (pai en vasco). Un pai que marchou de moi novo do lugar de orixe. O aita de Pampín naceu en Brocos, unha parroquia da Agolada. A uns 50 quilómetros de onde o seu fillo xogará este domingo.

A familia máis próxima agora vive preto de Melide, a unha media hora de Friol. Cando llo dixen a miña nai, estivo falando con eles. Xusto o domingo tiñan un compromiso e estaban tentando cambialo para poder ir ao partido”, comenta Pampín. A súas circunstancias de vida non lle permiten vir moito a Galicia, pero ten boas lembranzas: “De pequeno veraneaba todos os anos con meus pais. Cómese ben (risas) e o polbo bótase de menos. Algunha vez volvín e é unha terra especial”.

A pesar da súa viaxe a Galicia, Pampín está centrado no fútbol e no encontro: “Chegamos bastante ben. Con gana de comezar porque levamos dúas semanas sen xogar e xa se fai longo. Nos filiais é habitual ir de menos a máis. Conforme avanza a tempada, os equipos van engrasando mellor. Agardamos seguir coa boa dinámica de resultados. E sobre todo, seguir formando xogadoras. O obxectivo é que moitas delas teñan a oportunidade de facela pretemporada co primeiro equipo e surtir ao Athletic”.

O PM Friol ten o gol average gañado ante o Pozuelo e o Parquesol. Fonte: Elaboración propia

O PM Friol encara esta segunda fase co claro obxectivo de salvarse. O grupo vai estar conformado por nove equipos. O cadro friolés xogará só cos conxuntos aos que non se enfrontou na primeira fase. Terá dez partidos (ida e volta) contra o Athletic Club B, Zaragoza CFF, Seagull, Collerense e Espanyol B.

Dos nove conxuntos, catro descenderán á Primeira Nacional. Polo momento, a clasificación calcúlase cun cociente, xa que hai equipos que teñen máis partidos xogados da 1ª fase. Non obstante, ao remate da 2ª fase todos os clubs terán o mesmo número de encontros desputados.

A diferenza de puntuación entre o conxunto vasco e o lucense é clara. A pesar de xogar dous partidos a maiores, o Athletic ten xa oito puntos máis ca o Friol. En principio, o filial bilbaíno non vai ter problemas para salvar a categoría.

Por terras vascas teñen referencias do cadro friolés. “Algún partido temos a nosa disposición porque foron televisados. Logo tamén temos a experiencia do ano pasado. Porque o equipo xa xogou alí e sabemos as características do campo. Pero o que máis nos importa é o noso. Queremos que as demais se amolden ao noso xogo”, salienta o míster.

O PM Friol e o filial do Athletic xa cadraron a campaña pasada como rivais no grupo norte da Reto Iberdrola. O conxunto de Bilbao foi o campión de grupo. Aínda que non puido optar ao ascenso pola presenza do primeiro equipo na Primeira División. Precisamente a situación do conxunto A abriulle a porta a Roberto Pampín. “Apareceu a oportunidade da noite á mañá. Foi un xoves e xa nos tocaba viaxar. Non obstante, xa estaba en Lezama e adestro a moitas xogadores que xa as adestrei en ateriores etapas. Non é nada novo e estouno desfrutando”.

Pampín ten clara como debe ser a aposta polo fútbol feminino: “Aquí a categoría cadete xa leva uns anos. Medrou bastante. Falta saber como quedará todo logo da covid despois de moitos paróns. Pero o importante é comezar dende abaixo. O fútbol base hai que traballalo ben e, sobre todo, ter paciencia”.

Pampín chegou a debutar co primeiro equipo do Athletic de Bilbao en 2004. Foto: Athletic Club

Roberto Pampín chegou a xogar dos partidos co Athletic de Bilbao en Primeira División. Era o porteiro titular do filial cando o chamaron para suplir a baixa por lesión de Lafuente. Logo o 25 de novembro do 2004 expulsaron a Aranzubía no derbi vasco. Debutou con derrota, pero puido resarcirse a seguinte semana. O equipo venceu na súa estrea en San Mamés nun duelo de proximidade ante o Racing de Santander.

O gardamallas continuaría a súa carreira no filial e afrontaría as cesións ao Real Unión e ao Sestao River. Posteriormente marchou ao Eibar en Segunda División e tivo que deixalo definitivamente con 25 anos por un problema nas costas. Unha carreira futbolística ligada sempre ao fútbol vasco. “Entro todos os días en Lezama e séguenseme poñendo os pelos de punta. Cambiou moito a cando eu comezaba. Pero véñenme moitas lembranzas da infancia”.

Esta fin de semana, Pampín reencontrarase simbolicamente coas súas orixes. De seguro que o cheiro á terra lle axudan a coller impulso para o que virá. “Vou día a día. Gústame o que fago. É como estar nun soño constante”. Nun soño continuo está Pampín e tamén o PM Friol competindo un ano máis na Segunda División do fútbol estatal. Agardemos que os dous soños podan seguir sendo compatibles.

Luca´s Grill
Moreno´s Pizza
Imagen por defecto
Redacción Futbolinlugo
Artículos: 274

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.