A Terceira Rexional cumpriu xa as primeiras catro xornadas de competición. Mentres que no norte o Castro B lidera o grupo en solitario; a igualdade é máxima na zona sur. Catro equipos están empatados a puntos nos primeiros postos.

Na zona norte, o Castro B mantense na cabeza da clasificación co seu pleno de vitorias. Venceu nun bo exame á Comercial. Con tres puntos menos ca o líder, emerxe na segunda posición o Catro Roldas. O cadro de Román sumou a súa terceira vitoria seguida. Derrotou pola mínima ao Nuevo Nausti. A pesar da derrota é un resultado moi reseñable para o conxunto naustiano. É a primeira vez na curta historia deste equipo de Noche que perde só pola mínima.

Na terceira posición está agora o Rioaveso Machinango. O cadro de Paraños só puido empatar na casa ante o Cazás. Na zona máis baixa do grupo, o Friol B conseguiu o seu primeiro triunfo do curso. Fíxoo nos Chacotes de Palas onde actuou como local ante un Celeiro que pelexou a pesar das baixas.

Na zona sur, continúa a máxima igualdade nos postos dianteiros da táboa clasificatoria con catro equipos con nove puntos. O Lemos B é o que aparece como líder ao vencer por un axustado 2-3 ao Carballedo. O Sober é o segundo clasificado ao derrotar ao filial do Monterroso, outro dos equipos que se atopaba na fila dos seis puntos.