Esta mañá, Futbolinlugo deu un paso máis na súa curta historia. Coa firma dun acordo histórico e sen precedentes cun dos referentes da comunicación mundial. O acto tivo lugar no Hotel Tallón Eurobuildings de Roupar de Abaixo. Dende o próximo 1 de xaneiro, esta casa pasará a formar parte do conglomerado de empresas e asociacións de Sadam Media Consulting. Este grupo inversor dos Emiratos vén de comprar o 60% dos dereitos de Futbolinlugo por unha cantidade cercana aos 320.000 euros. Unha cifra sensiblemente superior ao valor estimado de mercado segundo o Instituto Nacional de Estadística.
A firma deste contrato non vai supoñer cambios no cadro de traballadores da web. Seguirán os catro. De feito, un deles tamén chegou a un acordo con Sadam Media, na súa faceta futbolística. O xigante asiático conta cunha sección de representación de xogadores. Á que remata de incorporarse o noso Santi Real, despois de que os dos Emiratos se fixesen co 80% do seu pase. O trotador lateral dereito seguirá no Racing Club Villalbés o que resta de campaña porén os chairegos recibiron nada máis e nada menos que un saco con 20 balóns Nivea. Así coma un dromedario para o presidente Paco Ruíz, que se convertirá no seu medio de transporte oficial en todos os encontros que o equipo de Terceira División dispute coma visitante.
As principais novidades chegan no ámbito dos contidos. A inxección económica de Sadam Media permitirá a Futbolinlugo retransmitir en ‘streaming’ un total de dez partidos semanais. Faceta para a cal acometerá dúas fichaxes para o seu equipo de comentaristas. A empresa dos Emiratos barallou coma primeira opción a Juanma Rodríguez, o ‘Maldini de Garabolos’. Así coma a especialista en fútbol feminino, Helena del Río. O elevado caché de ámbolos dous xornalistas impediu a súa incorporación. No entanto, sí chegaron a bon porto as negociacións con Manu Amor e Fernando Currás. Dous vellos coñecidos, que xa estiveron na Guía Futbolinlugo 2018.
