Esta semana só tivemos representación lucense na Primeira. E non ao completo, xa que o Antas descansou. A única noticia positiva foi o punto colleitado polo Lugo na súa visita ao Atlético Arousana. Quizais no mellor encontro do ano das albivermellas en canto a xogo.

As rapazas de Joaquín ben puideron golear ao seu rival pero perdoaron ata sete mans a mans, entre outras ocasións importantes. O Lugo pagou caro o seu único erro na saída de balón. E a falta de puntería fixo o resto. Yanire mandou na defensa. E Noa, María e Esther levaron a batuta en ataque, con escaso premio.

Cambiamos a fase de ascenso pola de permanencia, onde o PM Friol B deixou escapar os tres puntos da Reigosa. O cadro de Diego Vivero foi vítima dos seus propios erros e cedeu nun encontro importante ante un Atlántida Matamá con maior vontade e actitude.

O PM Friol B chegou a igualar, a menos dun cuarto de hora para o remate, os dous tempraneiros goles visitantes. No entanto, o Matamá golpeou de novo dous minutos máis tarde do último gol lucense e os puntos voaron da Reigosa.