O mercado non da nin 24 horas de tregua. As novidades acumúlanse nos despachos e os clubes seguen oficializando renovacións, novas fichaxes e despedidas. Desde Vilalba chegan moitas das novidades desta edición do noso #DiariodunMercado.

En primeiro lugar, Víctor Eimil, o incombustible lateral chairego, asina polo Real Unión de Fran Justo. O técnico coñece ao futbolista da súa etapa no Arenteiro, desde onde o carrileiro chegou ao Rico Pérez de Alacante, onde defendeu a elástica do Hércules. Por outra banda, o dianteiro Santi Gegunde renova no Racing Villalbés para cumprir a segunda temporada consecutiva na súa segunda etapa no club. Aitor fai o propio no filial racinguista, ao que se incorporou o curso pasado.

Xa anunciamos hai uns días que Fernando Cuadrado non continuará na Magdalena, e semella que o ariete xa atopou destino preto da casa. Segundo adiantou Non Vale Furar, a Sarriana estaría a piques de asinar ao cotizado dianteiro.

Na Primeira Galicia, o Meira renova a Santi Sommariva para manter a liña renovadora pola que aposta o conxunto. Unha categoría máis abaixo, o Folgueiro anunciou a renovación de Paguato, e o Cabreiros fixo oficial a incorporación de Joan Tembrás, que chega desde o Xermade. Mentres, na Terceira o Celeiro fixo oficial as renovacións de David López ‘Pelo’ e de Bruno Ramil.