O suposto inicio de temporada achégase. É por iso que todos os clubes da provincia traballan de xeito frenético para dar por pechados os cadros de xogadores e os corpos técnicos. É o caso do CD Lugo, cuxo filial competirá na Terceira División un ano máis, pero por primeira vez baixo o mando de Álex Ortiz, novo adestrador tras a destitución de José Durán. No conxunto albivermello renovan Álex Rey, Óscar Castellanos “Chiqui”, Dani Vidal e Antón Escobar, aínda que algúns destes futbolistas poderían saír cedidos a un conxunto de Segunda “B” ao longo da pretemporada. Ademáis, Fidalgo, Gabarre e Guitián soben desde o xuvenil.

Tamén da Terceira División sairá unha das perlas da provincia, Iago Parga. Segundo apuntou o xornalista Rubén García no seu Twitter, o sarriano será novo xogador da Peña Deportiva Santa Eulalia tras a súa marcha do Fabril. Máis abaixo, na Primeira Galicia, o gardamallas Carlos cambia o San Roque pola UD Pastoricense.

Na Terceira Galicia, a SD Castroverde renova a dous dos xogadores máis novos do clube: Xabi Duarte, que competirá por segunda temporada no conxunto verdibranco, e Pablo Pin, quen cumprirá a súa terceira tempada na Veiga do Olmo. Tamén no fútbol base hai novidades: un dos adestradores de moda, Diego Rey, compaxinará a súa actividade na SCD San Lázaro coa preparación dos xuvenís da SD Pol.