O Atlético Escairón conseguiu sorprender ao Cidade de Ribeira e conseguir unha vitoria por 0-3 que lles permite aferrarse ao tren da permanencia na Preferente Futgal antes dunha semana decisiva ao ter tres encontros nunha semana. Os da Ribeira Sacra xa están a sete puntos do Ribadeo, quen marca a permanencia, aínda que tamén está na loita o Lemos, ao que se enfrontarán na penúltima xornada da competición.

Unha das chaves da mellora é o traballo de Brais Prados dende a súa chegada. O adestrador do Atlético Escairón pasou polos micrófonos do Ser Deportivos Lugo desta semana e enfrontouse ás preguntas de Álex Gato, presentador do programa, e Eros López, redactor de Futbolinlugo. Na entrevista falaron do último encontro, a situación do equipo, o calendario, a loita pola permanencia e o seu próximo encontro ante o Negreira.

Ultimo encontro: «Foi un encontro moi bo pola nosa parte. Houbo xente coa que falei que se sorprendeu, pero nós non fixemos nada fóra do común. A moeda esta vez caeu do noso lado xa que materializamos as ocasión e Canario estivo moi ben baixo os paus. Estamos moi contentos».

Situación do equipo: «A vitoria é un chute de motivación, pero as nosas contas da leiteira só as podemos facer con nós e dependemos do que fagan O Val, Ribadeo e Galicia Mugardos. Agora estamos centrados en gañar ante o Negreira que é un rival moi complicado».