Así afrontan os Lucenses na Terceira a 2ª fase

Foto de portada: CD Arenteiro

O pasado domingo viviuse unha intensa xornada na Terceira Galega. Varios dos #LucensesNaTerceiraGalega puideron cumprir os primeiros obxectivos marcados ao principio de curso. Pero isto continúa e aínda queda moito en xogo:

Grupo ascenso:

Ademais do Polvorín, haberá catro xogadores lucenses que xoguen no grupo do ascenso. O Alondras é o único dos seis clubs que non conta con presenza de futbolistas da provincia.

O Bergantiños de Iago López lidera esta clasificación cun punto de marxe sobre o Arenteiro. O central monfortino é un dos fixos nos once de Lemos cando está en plena forma. Na última xornada da 1ª fase tamén xogou no Manolo Candocia ante o Somozas. Completou o seu décimo quinto partido xogado no que vai de campaña.

O Arenteiro de Víctor Eimil está no segundo posto. A outra das prazas que dá opción ao ascenso directo a Segunda da RFEF. Eimil chega en plena forma a este tramo da tempada. O domingo marcou un dos grandes goles da xornada e case que da tempada. Volveu ser titular ante o Pontellas por 15ª vez e marcou o cuarto gol coa camisola verde.

A cinco puntos do primeiro sitúase o Polvorín e cun punto menos colócase o Somozas de Aldán Naval. O futbolista viveirense non tivo minutos no duelo da pasada finde ante o Bergan.

Na 5ª posición, pero empato a puntos co Somozas, aparece o Arosa de Ross. O xogoador lucense perdeuse o primeiro partido do que vai de liga por sanción. Xa poderá estar dispoñible para o comezo da 2ª fase.

Alberto Suárez marcou esta semana o segundo gol no que vai temporada. Foto: CD Choco.

Grupo play off ascenso:

O grupo intermedio está encabezado polo Racing Villalbés. Os dous primeiros clasificados deste grupo xogarán o play off de ascenso fronte os equipos que queden do 3º ao 6º no grupo anterior. Haberá unha praza de ascenso en xogo.

A oito puntos do Racing está o Fabril e logo a nove puntos o Rápido de Bouzas, o Estradense e o Choco. O cadro de Alberto Suárez evitou o grupo de descenso na última xornada. O mediocentro foi protagonista porque o seu gol no tramo final do encontro permitiulle ao conxunto de Redondela levar tres puntos clave.

Na sexta posición deste grupo está o Silva. O cadro coruñés tamén evitou caer ao descenso na última xornada a pesar da derrota co Racing. Alí segue Xusto. O central foi titular a semana pasada ante o seu ex equipo e seguirá sendo un dos referentes en defensa para o colectivo silvista neste segundo tramo de competición.

Grupo permanencia:

Catro dos doce equipos do grupo que pelexará pola salvación teñen representación lucense. E precisamente catro tamén son os clubs que se salvaran neste grupo que evita o descenso.

O Arzúa é o segundo clasificado neste grupo. Ten 29 puntos. Un menos ca o Barco. Álex Vázquez e Pedro Delgado foron titulares de novo no partido ante o Polvorín.

Un punto menos ten o Viveiro que ten os mesmos ca o Ourense CF de Julio Delgado. O futbolista de Burela foi titular na derrota do cadro ourensán ante o Rápido de Bouzas.

A nove puntos da salvación vai comezar a segunda fase o As Pontes. A pasada finde empatou sen goles ante o Paiosaco. Brais Vázquez foi titular por segunda vez consecutiva. Deixou a súa portería imbatida.

A arbitraxe lucense nesta xornada decisiva tivo lugar na Estrada. Jesús López Fernández dirixiou o Estradense 2-0 UD Ourense. Estivo asistido nas bandas por Alberto Blanco Méndez e Adrián Fernández Teijido.

Imagen por defecto
Redacción Futbolinlugo
Artículos: 273

Deja un comentario