Antón Méndez: «É un orgullo que os xogadores que adestrei non deixaran o fútbol»

Antón Méndez adestrou a SD Becerreá, un dos equipos máis destacados da temporada 2021-2022 na provincia

A tempada 2021/2022 foi a do regreso das competicións do balompé máis afeccionado logo da chegada da pandemia. Os formatos das ligas foron diferentes e máis complicados de entender. O sistema non premiou a regularidade global da campaña. Un dos prexudicados foi a SD Becerreá. O cadro da Montaña foi dos mellores equipos da provincia. Quedou ás portas do ascenso á Primeira e foi campión da Copa Deputación por primeira vez.

Luca´s Grill
Moreno´s Pizza

Antón Méndez foi o adestrador dunha tempada histórica. As ligas volven en setembro ao seu formato habitual e Antón seguirá comandando ao club. Paralelamente exerce como adestrador do CD Lugo. Os últimos cursos foino no Xuvenil A, desta volta será o segundo técnico do Polvorín dirixido por Roberto Trashorras na 2ª RFEF. Conversamos con el sobre o éxito e o que virá por diante.

Futbolinlugo: Como analizas o que fixo o equipo o curso anterior?

Deportes Élide

Antón Méndez: Só é mellorable cun partido gañado máis, o que nos supoñería o ascenso. Ou que o Antas non gañara os oito encontros que gañou, que tamén mereceu subir como así foi finalmente. A nivel de resultados e de sensacións a tempada foi inmellorable.

Nas dúas competicións que xogamos poñemos unha nota moi alta. Ademais, estamos moi contentos porque o 90% dos futbolistas eran xogadores de club. Nada que reprochar, ao final é fútbol.

Fil: Se a liga fose aos puntos o Becerreá ascendería…

AM: Por suposto, pero hai que aceptar a norma como era. Gañar a Copa foi o mal menor porque o esforzo do equipo fora moi grande e o pau de non subir, tamén. Quédome con que se repuxeron para competir ben no torneo copeiro e tivemos ese premio ao gran ano.

«Ten moito mérito o do Antas e sobe merecidamente»

O Becerreá sumou 39 de 48 puntos na 1ª fase e 18 de 24 na 2ª

Fil: No contexto de pandemia, o formato de competición pareceuche o axeitado?

AM: Evidentemente agora dígoche que non, pero antes tamén. Creo que debería ser por coeficiente porque non era tan complicado. Os puntos correlativos que se deron ao pasar á 2ª fase premiaba pouco a tempada regular. A nosa distancia cos rivais era grande pero acurtouse todo a unha fase de oito partidos. Non obstante, ten moito mérito o do Antas e sobe merecidamente co formato que había.

Fil: A volta a normalidade da competición é ben recibida…

AM: Preferimos a normalidade sempre. É máis xusto e recompensa o traballo durante un longo período de tempo.

«Moitos dos xogadores que tiven este ano medraron comigo»

A SD Becerreá conseguiu a súa primeira Copa Deputación ao superar ao Iberia en Sarria

Fil: Ti xa levas uns cantos anos no club, como se consegue reunir a esa alta porcentaxe de xogadores da casa?

AM: É un traballo moi longo, que comezou en primeiro lugar co traballo do presidente, José Antonio. Desvívese polo club e busca recursos, xogadores e todo o que poda mellorar o Becerreá. Cando eu cheguei apenas había equipos en dúas categorías.

Con traballo e intentando facer as cousas ben, conseguimos que a xente dos arredores viñese aquí. Pero é un esforzo tamén dos pais porque algúns nenos tardan 30 ou 40 minutos en vir adestrar. Veñen dende Navia, Pedrafita, Baralla, etc. Fixemos tamén captación co deporte escolar e conseguimos ter moitos nenos. Moitos dos xogadores que tiven este ano medraron comigo. É un orgullo que polo menos non deixaran o fútbol.

Fil: Xa non destacas tanto que sigan no Becerreá, se non que sigan xogando ao fútbol…

AM: Non quero personalizalo comigo, é en xeral. Detecto que aos nenos e a xuventude cada vez lles custa máis ter constancia para adestrar e para seguir xogando. É gratificante que lles siga gustando o balón.

Fil: Seguirás un ano no equipo, foi fácil a renovación?

AM: O Becerreá é a miña casa, o club co que comecei a adestrar. Estou a gusto e, se as outras actividades non mo impiden ou o presidente decide non contar comigo, seguirei máis tempo.

«O poder sumar puntos nestas categorías é un tema de grupo»

Polo de agora Antón Méndez goza da plena confianza de José Antonio. Esta tempada estivo acompañado no banco por Javi Gómez

Fil: O listón desta tempada quedou alto, que obxectivos te marcas para a próxima?

AM: O primeiro obxectivo que me marco é que sigamos sendo un equipo. É o que nos vai dar seguir competindo ben. O poder sumar puntos nestas categorías para min é un tema de grupo. A partir de ser un equipo, a xente está implicada. Temos xogadores talentosos e intentaremos subir sabendo da dificultade.

Fil: Como compaxinas as túas funcións nun club con estrutura profesional como é o CD Lugo as que tes no Becerreá?

AM: A min non me custou. O que me sorprende é estar nun club profesional como o CD Lugo e adaptarme a iso, non ao outro. Veño do Becerreá, son dúas dimensións totalmente diferentes. Os recursos e o material humano non teñen nada que ver. Desde a maior da humildade veño e aí sigo. Teño a sorte de tocar tamén ese fútbol profesional.

Fil: O trato cos xogadores tamén é distinto?

AM: Distinto porque no ámbito profesional hai unha esixencia alta. No outro é unha perspectiva máis social, non tanto de rendemento (que tamén) pero algo máis de club.

Fil: Esa esixencia pode ter algo que ver no que falabamos antes de que moitos xogadores deixen o fútbol a idades temperás?

AM: A esixencia ten que ir en relación ás capacidades de cada xogador e a contorna que o rodea. Se estás nun club profesional, están os mellores e se hai algún que non dá un rendemento seguramente se trae outro xogador.

No outro prisma é algo diferente, que non exclúe que teñas que ser esixente. Para min hai que ser esixente con todos os xogadores independentemente do ámbito. Pero non é o mesmo nun lado que no outro.

«Sen José Antonio non existiría o club como tal»

O presidente, José Antonio foi manteado logo de que o equipo conseguira ser por primeira vez campión da Copa Deputación

Fil: Salientabas antes do papel de José Antonio, que é el para a SD Becerreá?

AM: Sen José Antonio non existiría o club como tal. É incrible como unha persona aglutina a capacidade de sacar nunha vila como Becerreá un club coñecido en toda a provincia. Na maior medida é froito da súa parte.

Imagen por defecto
Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

Artículos: 560

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.