O Racing Villalbés foi capaz decomezar con moi bo pé a súa andadura nesta campaña da Terceira RFEF, situándose entre os equipos que amosan unha maior solidez defensiva. Un exemplo claro de porque ese bon inicio estivo no último partido ante o Boiro na Magdalena. Un encontro que retrasou o seu inicio non foi doado para os chairegos, pero aí apareceu Álex Santomé para deter un penalti e realizar grandes paradas ao longo do encontro.
Xa é recurrente que o canteirán do Atlético de Madrid demostre ser un dos mellores porteiros de toda a categoría e esta campaña aumenta cada vez máis o seu estatus. Santomé pasouse polos micrófonos do Ser Deportivos Lugo desta semana e enfrontouse ás preguntas de Álex Gato, presentador do programa, e Eros López, redactor de Futbolinlugo. Na entrevista falaron do partido ante o Boiro, o inicio da tempada, o vestiario e o rendemento do equipo.
Entrevista a Álex Santomé do Racing Villalbés
Partido ante o Boiro: «Foi un encontro que estIvo marcado por moitas circunstancias, xa empezamos o partido tarde, mal e arrastro por culpa do campo. Non estivemos cómodos no terreo de xogo e o Boiro sorprendeume porque sabíamos da súa calidade individual pero penso que como equipo vai mirar aos postos altos».
Inicio da tempada: «Tivemos un arranque moi bon. Puidemos manter o núcleo da partida pese a que tivemos saídas importantes como a de Cañi, pero veu xente do filial que está aportando moito. Esa mezcla dun grupo asentado e a xente nova que ten tanta ilusión creo que nos permitiu este inicio».
Vestiario: «Somos unha familia. Non sei como son outros equipos, pero o Racing Villalbés xa de por si é moi familiar. Levamos moito tempo xogando xuntos e somos amigos fóra do campo, o que tamén aporta moito. Os novos tamén se sinten como na casa, o que lles da un extra».
Rendemento do Racing Villalbés: «Para estar arriba necesitas ter solidez defensiva. Os que encaixan pouco sempre están na parte alta e nos sabemos que ser competitivos pasa por encaixar menos.Imos medrar na parcela ofensiva porque temos moita calidade aí, como por exemplo Pablo Trigo que xa leva seis goles».
