Os Máxicos da Primeira Futgal continúan cos seus pasos nunha categoría que se está amosando moi igualada.

O Iberia rescata un punto tras a remontada do Taboada (3-3). Foron mellores os mariñáns na primeira metade, fixeron o 0-1 e xeraron moito perigo en rápidas transicións. O 0-2, porén, non chegou ata a reanudación (46′). Este segundo tanto deu alas ao cadro local, que xogou sen medo, mentres que o Iberia saiu do partido e non foi quen de volver a engancharse: moitas tarxetas, decisións arbitrais polémicas… En media hora, os de Martín Murado mandaban por 3-2. No tempo engadido, o Iberia empatou e sacou un punto que mereceu polo feito na primeira metade, 3-3 no «Canti».

Os Máxicos da Resi e da SD Chantada impoñen un ritmo moi alto aos seus perseguidores.

O Lourenzá convence na Santa Cruz a costa do Chantada Atlético (4-1). Un Lourenzá ben colocado e agresivo en transicións anulou ao Chantada Atlético. Casanova amosou a súa versión máis ofensiva, fixo o 1-0 e xerou moito perigo ata o descanso. Unha pena máxima antes do tempo de lecer supuxo o 2-0 tras o disparo de Luis e, xa na segunda metade, os chantadinos —incómodos durante os 90’— recurtaron diferenzas. A reacción local foi inmediata, co 3-1 tamén anotado por Casanova. Na recta final, o xuvenil Isayas pechou o choque co definitivo 4-1.

O Ribadeo supera ao Guntín nun partidazo (3-2). Foi un partido de ti a ti no Pepe Barrera. Os locais dominaron no comezo, pero Pérez aproveitou a primeira dos visitantes para superar a Pita no man a man (0-1). Co paso dos minutos, a ansiedade mariñá medraba, pero foi entón cando chegou Pedrinho —un dos Máxicos da xornada— para igualar o duelo cun testarazo á saída dun córner. Noutra acción a balón parado no engadido da primeira metade, Santi anotou unha falta directa para poñer o 2-1.

Non baixou os brazos o Guntín, que saíu dos vestiarios renovado e empatou cun golazo de Mateo, 2-2. Desde ese momento, os laranxas fixeron dano con transicións ante o dominio posicional do Ribadeo. Finalmente, a insistencia local traduciuse nunha gran acción de Pedrinho, cuxo centro se envenenou e supuxo o definitivo 3-2 cando tan só quedaban 5 minutos para o asubío final.

O Escairón lévase tres puntos de ouro de Outeiro de Rei (0-2). A mala versión dos chairegos foi aproveitada polos do Saviñao, que están demostrando moito oficio nas últimas xornadas. O xogo dos visitantes, con ataques verticais por fóra para despois castigar a área do Outeiro, non foi neutralizado polos de Fer Corredoira. Un efectivo Mario fixo o 0-1 na recta inicial e puxo o choque de cara para os seus. O Outeiro, aínda que tratou de gañar presenza por medio do balón, non estivo atinado na toma de decisións, mentres que o Escairón soubo agardar a súa opción para sentenciar. Foi o propio Mario, cando xa se cumpría o tempo regulamentario: 0-2.

A Residencia imponse no derbi das expectativas (4-0). Había posta moita ilusión nun duelo que non se producía desde a temporada 2016/2017. A festa dos cativos deu paso a un duelo moi intenso, no que a Milagrosa tratou de reducir os espazos que xeraban os branquiazuis co seu bo xogo combinativo. Dous goles de Mauro antes do descanso inclinaron a balanza a prol dos da Cheda, que demostraron manexar á perfección o seu feudo para anotar outros dous goles no segundo tempo e pechar o resultado. Os de Madriles mostraron, pese ao resultado, unha boa versión, pero os locais amosaron unha imaxe ofensiva doutra categoría para sacar tres puntazos.

Xove e Castro reparten puntos no Municipal (2-2). Adiantáronse os locais, que foron mellores ao longo de todo o primeiro tempo. Aínda así, os de Dumi remontaron antes do descanso cun gol de Goás e cun remate de Cadenas á saída dunha falta lateral, 1-2. O Xove aproveitou un erro visitante en saída de balón á volta de vestiarios, porén, para igualar de novo o resultado. Desde ese momento, o equipo que buscou a victoria con máis ímpetu foi o Castro, pero os mariñáns souberon aguantar o resultado e os puntos se repartiron para os Máxicos de ambos conxuntos.

A SD Chantada non baixa o ritmo e tamén golea (5-0). Aínda que o entramado defensivo do Foz impedía que os do Sangoñedo penetrasen na área, a paciencia e o altísimo ritmo co balón que están a impoñer os de Traste foise traducindo en ocasións. Pedro foi o único capaz de perforar a rede rival antes do descanso, 1-0. Na segunda metade, os mariñáns acusaron o esforzo realizado e viron como o seu rival anotou catro goles en apenas vinte minutos para sentenciar o duelo. Os Máxicos de Pelayo loitaron ata o final para recurtar diferenzas, pero o electrónico non se moveu, 5-0 no Sangoñedo.

Un penalti dalle os puntos ao Brollón ante o filial do Antela (0-1). A primeira parte, igualada, tan só se inclinou para o lado lucense co penalti que anotou Miguel en torno ao 10′ de xogo. Na segunda metade, porén, os ourensáns apretaron moito e puxeron en moitos apretos á zaga do Brollón. Aínda así, os Máxicos dos Medos tiraron de coraxe e conseguiron —acompañados polo sempre presente factor sorte— aguantar o resultado para sacar tres puntos de ouro dun campo moi complicado.

Choiva de goles entre Monterroso e Racing Villalbés ‘B’ (5-3). Os dous conxuntos propuxeron un fútbol moi atractivo, pero o compromiso dos locais deixouse notar para competir a un gran nivel durante os 90′. Ao gol inicial de Isma respondeu Migui desde os once metros, e para o 2-1 de Fernandito á saída dun córner tamén tivo resposta Hamza, neste caso cunha gran vaselina. David puxo o 3-2 en transición, logo de regatear a Duarte e aínda antes do descanso.

O 4-2 de Burgo, de novo nunha acción a balón parado, ao pouco de pasar por vestiarios supuxo un gran golpe para os chairegos. Aínda que o intentaron, os Máxicos de Iván Lamas encaixaron o 5-2 e pecharon o choque co definitivo 5-3 de Migui, que anotou neste caso de falta directa.

Oural e Santaballés pecharon a xornada co dominio chairego (0-3). A intensidade e o fútbol directo do Santaballés impuxéronse á intensidade local. O 0-1 chegou logo dun saque de portería visitante, prolongado e aproveitado ás costas da defensa. Ata o descanso, os sarriáns estiveron desdibuxados e puideron encaixar máis goles. Aínda que na reanudación o Oural mellorou co cambio de sistema, os chairegos amosaron a súa mellor versión, conseguiron o 0-2 logo dunha gran acción por banda e pecharon o resultado nunha acción a balón parado para saír da última posición.