Un auténtico partidazo no Polvorín. Será o domingo ás 20:30 horas coa arbitraxe de José Luis Fraga Torres. San Roque e Becerreá enfrontaranse nun choque co liderado do grupo sur da Segunda Futgal en xogo, un galardón que se repartiron entre os dous conxuntos durante a totalidade das xornadas, co permiso da Sarriana B que liderou na primeira data ligueira. Iso si, o Santa Comba é terceiro clasificado e ameaza con arrebatarlles o posto. Xogará ás 16:15 horas en Tras do Novo diante do San Lázaro.
Primeiro clasificado é o San Roque, posición que ocupou durante seis xornadas, e buscará saír reforzado da visita do Becerreá. Os de Rubén Sanjurjo ‘Piru‘ comezaron a liga con cinco vitorias consecutivas e só caeron derrotados fronte ao Ferreira no Polvorín. Os lucenses son o segundo conxunto máis goleador do grupo, só superados polo Antas e contan cun dos máximos artilleiros do campionato, o atacante Jul.
Tres xornadas liderou a táboa o Becerreá. O cadro da montaña, ao igual que o seu rival, non coñeceu a derrota ata a sétima xornada, cando perdeu diante do Palas, e volveron facelo na derradeira logo de caer no seu feudo fronte ao Portomarín. Os de Javi Gómez son, xunto co Monterroso B o conxunto menos goleado do grupo, mantendo a portería a cero en catro encontros dos dez disputados.
O último enfrontamento entre dous dos grandes candidatos ao ascenso á Primeira Futgal dos últimos anos tivo lugar no Polvorín o pasado día 13 de abril e rematou con triunfo do San Roque por 3-1. Diego e Jul, este último en dúas ocasións, marcaron para os locais, e Kevin anotou para o Becerreá.
Falamos con dous protagonistas que precisan pouca presentación. Manu Cedrón, porteiro do San Roque e tamén adestrador de porteiros do Bergantiños, e Rubén López ‘Ruchi‘, central do Becerreá.
QUE OPINAN OS PROTAGONISTAS?
Manu Cedrón (San Roque)
O comezo. «Este primeiro tramo de liga foi moi bo, sacando un par de tropezos que tivemos, pero creo que estamos nunha boa dinámica e competindo a este nivel poderemos seguir aí arriba pelexando polo ascenso«.
O Becerreá. «Agardamos un partido complicado. Creo que son o mellor equipo da categoría e contan con xogadores de moito nivel como Dani Pérez, Ruchi, Kevin . . . Vai ser un encontro que se decantará para calquera dos dous lados por pequenos detalles e esperemos estar máis atinados ca eles«.
Unha retirada que non chegou. «Era unha decisión que levaba un tempo meditando. Deixar de xogar para ser adestrador, que é o que realmente me motiva. Pero surxiu a oportunidade de poder xogar aquí ao carón da casa e fágoo sempre que podo. Ademáis de adestrar aos porteiros do Bergantiños tamén estou na base do CD Lugo, polo que tempo a aburrirme non teño«.
Con Simón Lamas no Bergantiños. «A convivencia no día a día con él é moi boa. Sorprendeume a súa cercanía e as ganas de seguir medrando e mellorando no fútbol. Creo que estamos no bo camiño e o Bergantiños é capaz de competir en calquer esceario«.
Ruchi (Becerreá)
Un Becerreá reforzado. «Había unha base grande no club. Este ano incorporámonos novos xogadores e outros subiron de xuvenís, polo que contamos cun bo grupo. Creo que este primeiro tramo de liga foi de adaptación e paréceme que saímos moi reforzados«.
O partido no Polvorín. «Non coñezo demasiado a categoría, polo que se me fai complicado facer unha valoración. Polo que me explican vai ser un partido moi igualado no que será moi importante non cometer erros. O que o consiga levará os tres puntos«.
Un ascenso que se resiste. «Espero que este ano podamos acadalo. Pero a liga é moi longa e pode pasar de todo. Creo que as nosas opcións pasan, sobre todo, por ser un equipo unido, e tamén por seguir mellorando e aprendendo cada semana«.
A AXENDA DA FINDE NA XEOGRAFÍA LUCENSE
Primeira Galega Feminina
Antas -Xallas (Domingo ás 16:30 horas no Castro Seoane): as locais queren darlle continuidade á súa boa xeira e sumar a sexta xornada sen coñecer a derrota.
Segunda Galega Feminina
Milagrosa – Ordes (Domingo ás 18 horas no Luis Gorgoso): as lucenses buscarán o seu terceiro triunfo consecutivo que as meta en postos de promoción. O rival suma só un punto na competición.
Terceira Galega Feminina
Chantada – Comercial (Domingo ás 12 horas no Sangoñedo): as locais buscarán seguir na zona alta nun encontro no que a Comercial quererá estrear o seu casilleiro de puntos.
San Roque – Friol B (Domingo ás 18 horas no Polvorín): a culminación dun plan perfecto de domingo no Polvorín. Acudir ao encontro das rapazas do San Roque, que buscarán achegarse ao liderado das visitantes e rematar a finde ás 20:30 co partido dos branquiverdes co Becerreá.
Terceira RFEF
Racing Vilalbés – Boiro (Domingo ás 12 horas na Madalena): logo de tres empates consecutivos, os de Juan Rodríguez buscarán sumar os tres puntos e voltar á zona de play off.
Preferente Futgal
Burela – Betanzos (Domingo ás 16 horas na Marosa): os de Oke tentarán sumar a oitava xornada sen coñecer a derrota. Reciben ao seu máis inmediato perseguidor, un Betanzos que sempre é favorito ao ascenso.
Lemos – Antela (Domingo ás 17 horas na Pinguela): os monfortinos buscarán ampliar a súa espectacular racha e seguir invictos. Enfronte un Antela que baixa as súas prestacións a domicilio.
Primeira Futgal
Residencia – Milagrosa (Domingo ás 17:30 horas na Cheda): derbi capitalino entre dous conxuntos chamados a pelexar por retornar á Preferente. Os de Rafa Casanova buscarán seguir invictos e asaltar o liderado, mentres que os visitantes recurtar diferencias co ascenso directo.
Segunda Futgal
Folgueiro – Cabreiros (Sábado ás 16 horas en Boa Vista): os locais, invictos, queren recuperar a primeira praza que ocupa o Riotorto. Enfronte un Cabreiros ferido logo de colleitar dúas derrotas consecutivas.
Santa Comba – San Lázaro (Domingo ás 16:15 horas en Tras do Novo): os locais queren os tres puntos para poder rematar a xornada líderes. Os visitantes volver a gañar e seguir escalando postos na clasificación.
