Fin de semana de fútbol case perfecta para os equipos femininos da provincia que desputaron partidos, a excepción do San Roque que, no derbi provincial ante o Chantada, caeu derrotado.

O partido desta fin de semana era complexo. As friolesas desprazábanse ata terras coruñesas para enfrontarse ao Orzán que, de gañar, arrebataría a segunda praza na táboa ligueira ás amarelas.

Así, e como era de agardar, o partido comezou moi igualado. Na primeira metade do encontro as protagonistas foron as imprecisións. Yoleidis tivo nas súas botas as ocasións máis claras durante os primeiros 45 minutos, pero o PM Friol non conseguía finalizar ben as xogadas para poder adiantarse no marcador.

Pola súa parte, o Orzán no levantaba o pé do acelerador. As locais tiveron tres ocasións moi claras para anotar, pero unha grandísima Sara emerxeu baixo os paus da portería friolesa para facela infranqueable.

Tras o paso polos vestarios, o PM Friol saiu mellor ao segundo tempo. Yoleidis era unha auténtica dor de cabeza para o Orzán e ela mesma provoca un penalti favorable ás amarelas que transformaría Keisy no único tanto do partido: o da vitoria do cadro friolés para manterse na segunda praza e recurtar distancias a As Celtas B, que pinchou esta xornada.

Non foi o mellor partido para as celestes pese a enfrontárense a un equipo, a priori, asequible: a Pastoriza.

As ulloás saíron dominando o encontro e así o fixeron visible tamén no marcador ben axiña. Jenny puxo o 1-0 no min. 8 e Yanire aumentou a vantaxe aos 2 goles no min. 11.

A presión alta do cadro dirixido por Óscar Méndez dera os seus froitos, o Antas era superior e xeraba ocasións. Porén, cos dous goles no luminoso no canto de sentenciar o partido continuando co dominio do encontro, as tornas mudaron.

O Antas perdeu as rendas do xogo e as dudas entraron no Castro Seoane. Así, A Pastoriza cada vez máis cómoda no partido; obtivo a súa recompensa en forma de gol olímpico de Sabela.

A partir de entón o partido fíxoselle longo ás de Óscar Méndez. Os trocos introducidos axudaron a paliar os problemas que presentaba o cadro local. Non sen dificultade pero tamén con mérito, o Antas aguantou o restante do encontro para sumar outros 3 puntos e continuar na metade alta da táboa (6º).

Unha grandísima primeira metade da Milagrosa, cos 5 goles do partido nos primeiros 31 minutos de xogo, sentenciaba o partido ante o Nicrariense pola vía rápida.

De novo, unha Irene excelsa, marcou o camiño da vitoria para as branquivermellas co seu particular hat-trick. Alexia e Martínez anotaron sendos goles para firmar o resultado redondo e final que quedara xa visto para sentencia na primeira parte: 5-0.

Os primeiros 70 minutos do encontro só tiveron unhas donas, as locais, as xogadoras do San Lázaro. Ben posicionadas, moi serias no xogo e moi correctas no dominio do balón pese á perigosidade especialmente no bloque alto do Eirís.

Así, Xiana puxo o 1-0 aproveitando un rexeitamento a un tiro de Anita. O 2-0 púxoo Dou nunha acción individual de gran calidade e coa que fixo dano ás rivais durante todo o encontro. O 3-0 chegou de penalti das botas de Anita.

Ao verse 3-0, os trocos introducidos polo San Lázaro semellaron saltar ao verde con demasiada relaxación, e así o pagaron. Sara recurtou distancias no 70′ (3-1) e Carolina fixo o propio no 88′.

O San Lázaro rematou o partido sufrindo máis do que debera, pero ao fin e ao cabo, con outros 3 puntos xa no peto.

Partido de ti para ti entre o San Roque (local) e o Chantada. Ambos conxuntos tiveron ocasións claras para poder anotar nunha primeira metade moi igualada.

O Chantada xa avisara no primeiro tempo con chegadas de perigo de Isa man a man coa porteira verdibranca, Cristina; o tiro ao pau longo de Iria, un bo tiro de Saray ou unha clara ocasión para Noela na área pequena. E como quen avisa non é traidor, Iria conseguiu anotar o primeiro gol do partido xa no tramo final do encontro despois dun bo pase dende a dereita de Lucía.

Pero o San Roque tamén tivera as súas para marcar, como nunha acción clarísima no 45′ que porén foi desbaratada grazas a unha excelsa actuación defensiva de Nati. Porén, tamén as verdibrancas obtiveron o premio do gol para empatar o partido no 78′ por medio de Eva cun tanto desde o medio campo.

Xa nos últimos intres do partido, o Chantada botouse arriba con todo para tentar anotar o gol da vitoria. Lucía tivo unha primeira oportunidade de volver adiantar ao Chantada no marcador despois de que un disparo de Iria pegara no longueiro e o balón chegara ás súas botas, pero non foi quen de anotar. Pero non fallou de novo. Na seguinte xogada de perigo, Noela centrou un saque dende o curruncho que Lucía rematou sen dúbidas para mandar o esférico ata o fondo da portería.