A temporada 24/25 na Segunda Futgal non rematou. Logo da eliminación do San Roque na primeira rolda da fase de ascenso, o Riotorto tratará de subir á Primeira. Do salto de categoría do conxunto riotortense, depende a salvación da Piringalla.

Precisamente, como o Riotorto se mantén en competición, retrásase a Copa Deputación. A semifinal entre o Folgueiro e o club riotortense aínda non ten data oficial. Pola súa parte, os dous mellores equipos da liga regular na Segunda Sur, San Roque e Brollón, xogarán a outra semifinal o domingo 8.

O Riotorto pasa pola Universidade para ascender

O Riotorto está ante a posibilidade de volver, tan só un ano despois, á Primeira. Se supera a eliminatoria a dobre partido co Racing San Lorenzo, ascende. Para iso, non vai ter que sacar adiante ningún grao nin máster, pero terá que pasar pola Universidade.

Este domingo xógase o partido de ida (ás 17:00 h) no Campo de Fútbol da Universidade de Santiago de Compostela (USC), con céspede de herba artificial. A casa habitual do Racing San Lorenzo é o mesmo lugar no que decenas de estudantes xogan a liga universitaria cada curso académico.

O Racing San Lorenzo representa ao barrio do mesmo nome na cidade de Santiago e sitúase na contorna do coñecido como Campus Sur da USC. O equipo, con orixes case centenarias, chega a esta fase tras eliminar ao Brexo Lema nos penaltis.

O Racing San Lorenzo foi 2º na súa liga e o mellor equipo do concello de Santiago, por diante do Amio e do Victoria FC. O grupo mestura veteranía e xuventude e o curso anterior logrou o ascenso a 2ª.

Os penaltis tamén foi o método co que o Riotorto accedeu a esta fase ao eliminar ao Soneira. Logo de perder na ida no Municipal de Vimianzo (2-0), os pupilos preparados por Roberto Ramallal lograron empatar a eliminatoria.

Todo despois de que na Veiga, os primeiros en marcar tamén foron os visitantes. Dominaban por 0-3 no global. Con todo, Martín Traba e Ivi López déronlle a volta ao marcador no primeiro tempo. Preto do final, José Luis Ferreirós logrou o terceiro. Na quenda de penaltis, resultou decisivo o tanto marcado por Martín Traba, un dos últimos reforzos de luxo que se incorporou ao cadro riotortense.

A Piringalla pendente do Riotorto para quedar en Segunda

Como xa vos vimos relatando nos últimos meses, os descensos dos equipos lucenses de Primeira arrastran en cadanseu grupo na Segunda. No norte, ao baixar o Meira, arrastra ao Mondoñedo e, ao descender o Pastoricense, implicaría a baixada en cadea da Piringalla. Con todo, o ascenso do Riotorto permitiría deixar ese oco libre para o cadro da Pastoriza e así, a Piringalla podería manterse.

O San Roque só termou en Sada

Os pupilos preparados por Piru quedaron fóra das opcións de ascender, ao quedar eliminados polo Sada CF. Na ida, lograran un meriotorio empate (1-1) nas Mariñas – Andrés Pena. O gol de Vigo mantiña moi vivo ao San Roque na eliminatoria.

Non obstante, no Polvorín, o cadro coruñés accedeu a seguinte rolda ao vencer (0-2). En dez minutos no segundo tempo puxeron o partido ao seu favor con dous goles, o primeiro de penalti.

A boa temporada do San Roque queda sen o premio do ascenso, pero aínda pode conseguir outro éxito. O equipo xogará o domingo 8, tamén na casa, as semifinais da Copa ante o Brollón, recén ascendido á Primeira.

O Incio descende á Terceira Futgal

O conxunto amarelo dependía dun hipotético ascenso do San Roque para seguir tendo un oco na Segunda sur a tempada que vén. Esa circunstancia non se produciu e baixa á Terceira ao finalizar na 14ª posición.

O Incio Terra Brava iniciará unha nova etapa na 3ª, tras o seu ascenso de hai dous anos. O adestrador Roberto Díaz ‘Ruboi’ non continuará no club.

O Chantada B pendente da Sarriana ou do Estradense

O filial chantadés terá que agardar aínda case un mes máis para saber en que categoría xogará o ano que vén. O seu descenso por arrastre está condicionado polo do Oural na Primeira, que se ve afectado polo descenso en cadea que provoca a SD Compostela dende a 2ª Federación. Iso só se soluciona se un galego da 3ª RFEF ascende na fase de ascenso.

A Sarriana e o Estradense xogan a eliminatoria final galega. O que gañe accede á final estatal ante un equipo murciano. Se Sarriana ou Estradense soben, evitan o descenso do Barbadás na 3º RFEF, do Val na Preferente, do Oural na Primeira e do Chantada B na Segunda Sur.

O filial chantadés atópase nunha situación similar á do ano pasado, que quizais aínda foi máis dramática, porque a incerteza foi máis grande. Dependían da Milagrosa, que finalmente quedou en Primeira e o Chantada B puido competir en Segunda. A resolución coñeceuse practicamente en setembro.

A espera da Copa que desespera

Un mes van botar sen xogar o Folgueiro e o Brollón. O Folgueiro rematou a liga o 11 de maio e aínda non ten data fixada para a semifinal de Copa co Riotorto. Para máis inri, a rolda, en principio, vai ter que xogarse pola semana. A finde que vén, o Riotorto ten a volta da final polo ascenso e a final de Copa está prevista para o domingo 15.

O Brollón tamén rematou a liga o 11 de maio, iso si, fíxoo ao grande tras ascender á Primeira. O éxito probablemente fixera máis amena a espera, pero, dado o momento da temporada, o tempo faise tamén longo.

Os equipos que superen ambas eliminatorias xogarán a gran final pola Copa Deputación 2025 da Segunda e da Terceira. Un deles revalidará ao Iberia como campión e levará unha cantidades apetitosa para as contas do club.

Á espera de que finalice de por si a tempada, un feito queda constatado. O que dixo Futbolinlugo en agosto cumpliuse: os novos formatos provocan que provincia perde representación no fútbol galego. Para que non perda máis, xogan un papel clave a Sarriana e o Riotorto.

Os datos da Segunda 24/25