Salvatierra Abogados patrocina unha semana máis aos Máxicos, na primeira xornada de promoción para Castro e Resi, e na recuperación dos partidos adiados por trebón na Copa Deputación.

O Castro tira de veteranía ante o Polígono (2-0). Chegou un equipo moi ben formado ao Arturo Pereiro, con moita calidade e as cousas moi claras. Porén, os xogadores lucenses tiraron de experiencia e de bo facer para anotar dous goles mediado o primeiro tempo e manter unha importante renda ata o asubío final do colexiado.

Á Residencia faltoulle pegada en Celanova (0-0). As ocasións máis claras, tanto na primeira coma na segunda metade, foron para os branquiazuis. Porén, o Sporting Celanova tamén puido anotar, pero a defensa lucense mostrouse resolutiva. Ao término dos 90′, o premio semellou excesivo para os ourensáns e curto para unha Resi que terá que ser máis efectiva na Cheda.

Os Máxicos de Taboada, SD Chantada, Guntín e Monterroso seguen adiante na Copa

O Taboada neutraliza ao Pol (3-0). Os Máxicos de Martín Murado mostraron que queren rematar o ano cun título: logo dunha primeira parte excepcional na que anotaron tres goles e apenas permitiron ao Pol despregar o seu fútbol, no segundo tempo mantiveron a renda sen apuros e inquedaron a meta de Manu Cedrón en contragolpes para concluir o duelo eliminando a un cadro de categoría superior.

A SD Chantada pon punto e final á temporada do San Lázaro (2-0). Aínda que os Máxicos da Ponte competiron ben durante os 90′, a calidade da SD Chantada xa inclinara a balanza no primeiro tempo: un golazo de Manute logo dunha recuperación e un pase de Joserra para definición de Xende que supuxo o 2-0. Na segunda metade baixou o ritmo e tan só o gardamallas visitante evitou que a renda fose máis amplia.

O Guntín domina ao Pastoricense (5-1). O cadro laranxa deixou clara a súa candidatura á copa cun gran partido no que xa dominaba por 4-0 no 25′. O Pastoricense, no que tiveron participación os menos habituais, competiu con moito orgullo e mereceu un resultado máis curto, pero a efectividade e a calidade dos locais nos últimos metros decantou o choque no Ladairo.

Yoni remonta co Monterroso na Liga (1-2). Estaban cómodos os Máxicos chairegos no primeiro tempo, con ocasións claras que non concretaron. No segundo tempo, un gol de falta directa de Josiño supuxo o 1-0 e, cando o partido semellaba morto, Yoni aproveita unha acción desafortunada para empatar. Os visitantes enviarían un balón ao pau e o Santaballés erraría unha transición antes de que os vermellos anotasen o 1-2 que lles permitiu pasar de rolda na copa.