A primeira Xornada de Tecnificación do ano 2025 de Futbolinlugo realizarase no campo das Gándaras de Lugo o día 5 de marzo de 9.30 horas a 14.30 horas. O evento, orientado a cativos entre os 5 e os 15 anos, está pensado para que os xogadores do futuro poidan mellorar os diferentes xestos técnicos da man dos mellores adestradores da provincia. A actividade realizase coa colaboración da Xunta de Galicia e o Concello de Lugo.

A Xornada de Tecnificación está coordinada por Diego Díaz, redactor de Futbolinlugo e Jairo Campo. Na presentación realizada esta mañá no Concello de Lugo estiveron presentes, ademais de Diego Díaz, o Concelleiro de Deportes no Concello de Lugo, Jorge Bustos, e o Xefe do Servizo Municipal de Deportes da Xunta de Galicia, Manolo Cadramón. 

Unhas xornadas de tecnificación orientadas á técnica

O plan das xornadas consta dun traballo por estacións no que “a idea é traballar con algúns dos mellores adestradores da provincia os diferentes xestos técnicos dende o analítico ata o integral”, afirma Diego Díaz. Tras os adestramentos, os cativos disputarán diferentes partidos para pechar o día e disfrutarán de xogos lúdicos antes dunha clausura na que haberá diversas sorpresas para os participantes. O pack tamén inclúe unha pequena merenda entre os adestramentos e un agasallo para cada xogador.

“Este tipo de xornadas cumpre un obxectivo múltiple: achegar aos cativos á nosa realidade e que coñezan Futbolinlugo, xa que serán os xogadores do mañá dos equipos sénior da provincia e favorecer a conciliación familiar para os pais aportando unha actividade diferente”, afirma Diego Díaz, que tamén apunta que “queremos construir pontes, non destruilas, e por iso facémolo pola mañá, para que poidan facer todas as súas actividades e acudir aos adestramentos cos seus clubes”.