O mercado está máis vivo que nunca. Pese a que aínda non rematou a temporada, hai clubes que xa pensan no seu proxecto para a 24/25: as despedidas acumúlanse nos campos lucenses, así como as incorporacións e renovacións de pezas chamadas a ser chave en cadanseu conxunto.
A maior parte das novidades chegan desde os banquiños. Juanlu Bernal, segundo adiantou La Voz de Galicia, renova como técnico do Lemos, mentres que Piru fai o propio á fronte do San Roque. Ademais, Jesu Rial volve aos campos da man do Celeiro Club del Mar.
Oportunidades no mercado para preparadores
Porén, tamén hai que lamentar a marcha de adestradores que, ata hoxe, foron un emblema nos seus equipos. Á sonada marcha de Simón Lamas do Racing Villalbés, súmanse outras. Gayol deixa o banco do Martínez Otero e seguramente asumirá outro rol dentro do club, mentres que Rubén Bergantiños marcha do Paradela. O Relámpago Taboada tamén perde ao seu técnico Diego, mentres que outro Diego, Dopico, di adeus ao Roupar logo de oito anos no conxunto verde.
Tamén na sede do IV All Star Futbolinlugo hai movementos. Hugo Vázquez e Kike Sanfiz deixan un Guntín para o que sonan Seoane e Mourelos. Outro adestrador que acadara o ascenso á Primeira o pasado curso é Marquitos, que deixa o Guitiriz.
Xa no caso dos xogadores, Fabián Tourón é a primeira baixa dun Portomarín que volve á Segunda e que perde ao seu presidente, o carismático Chapu. En Montirón, Miriam deixa o San Roque por motivos académicos. Pola súa banda, o ariete mariñán Dani Pedrosa non continuará no Bergantiños logo de ascender á Segunda RFEF.
