José Antonio Quelle ‘Pichi’ regresou aos bancos da provincia. Unha estrea máis que desexada despois dun longo tempo afastado da primeira liña do verde. Un 4-0 ante o San Tirso que alimenta as esperanzas do Ribadeo na Preferente Galicia Norte.
‘Pichi’ é un dos homes de moda no fútbol lucense. Por iso, quixemos falar esta semana co novo preparador dos do Pepe Barrera nos micrófonos de Radio Lugo Cadena Ser. O noso redactor Diego Díaz e o presentador da Cadena Ser Alex Gato, foron os mestres de cerimonias.
Pódese escoitar a nosa participación íntegra aquí (ademais, analizamos as citas sobranceiras da fin de semana no fútbol feminino, a Segunda e Terceira RFEF como cada xoves).
Nas próximas liñas resumimos todo o que falamos co novo técnico do Ribadeo. Desde o seu debut, pasando por posibles fichaxes, ata os motivos que o levaron a asinar polos mariñáns.
O debut soñado? «O equipo viña un pouco necesitado, máis ben a nivel de ánimo. Ante un equipo complicado como o San Tirso, gañar así 4-0 axuda a saír desa mala xeira. Polo menos, para cambiar a moral do cadro de xogadores».
Valoración do cadro de xogadores? «Houbo xente que parou. O cadro de xogadores quedou algo curto, coas lesións e iso. A xente está adestrando moi ben. Confío moito neste Ribadeo a nivel de calidade. Agardo que teñamos o compromiso necesario, que pedín, de aquí a final de Liga. Logo a ver se conseguimos dúas ou tres ‘peciñas’ máis e penso que nos pode chegar para ir tirando ata final de tempada».
Posicións a reforzar? «Fundamentalmente necesitamos algo atrás, laterais. E xente en banda, máis arriba. Con dúas ou tres persoas podemos arranxar».
Obxectivo do equipo? «Coa igualdade que hai, os arrastres… Estás metido aí… O obxectivo é a permanencia. Pero como di o gran Simeone, iremos partido a partido e ata onde nos leve a Liga. Agora gañamos dous ou tres postos pero podémolos perder a semana que vén. Tamén é certo que cunha boa dinámica te podes meter arriba. A ver se conseguimos unha regularidade para saír de aí abaixo o antes posible».
Os motivos de asinar co Ribadeo? «É un equipo histórico. Se te chama un equipo como o Ribadeo, métenche o ‘gusanillo’. Había xogadores que xa coñecía e coincidín con eles. Cando contactaron comigo non tardei en decidirme».
Foto portada: EL PROGRESO
