A última categoría do fútbol afeccionado lucense rematou a pasada finde a súa primeira fase no norte e no sur. Castro e Lemos B xa tiñan asegurado o seu posto de cabeza neste primeiro tramo de competición. Só quedaban algunhas posicións por decidir, aínda que a importancia non é grande. Todos os equipos pasan á 2ª fase con opcións de ascenso.

Os dezaseis clubs que compiten na categoría repártense agora en catro grupos. A zona norte divídese en dous e a sur noutros dous. Quedan encadrados segundo as posicións da 1ª fase e pasan cuns puntos correspondentes ao feito ata o de agora. Non obstante, as diferenzas son mínimas. O equipo que quede campión de cada grupo, ascende. A 2ª fase comeza en dez días, a finde do San Xosé.

Na zona norte, o Castro B rematou a primeira parte a liga conseguindo un novo triunfo. Derrotou como visitante ao outro filial do grupo, o Friol B (5º). Sumou 34 puntos, tres máis ca o Catro Roldas que tamén gañou no seu derbi ante o Rioaveso (4º).

Tamén finalizou con tres puntos máis a Comercial (3ª), aínda que as sensacións non foron as mellores ante un Nausti (8º) que deixou unha boa imaxe na capital. O Celeiro (7º) e o Cazás (6º) empataron a un gol. Crende conseguiu anotar un gol de nivel para o conxunto xermadino.