Volve o fútbol amateur á provincia. O vindeiro domingo comezarán a temporada os clubes da Terceira RFEF, mentres que o día 19 o farán os lucenses da Preferente. Aínda así, non todos os equipos teñen pechados os seus cadros, en particular os da Primeira, Segunda e Terceira Galicia, que terán que agardar unhas semanas máis atá o día da súa estrea.

Porén, a primeira novidade chega desde a Preferente. Mauro Poratti, atacante con pasado en clubes do prestixio de CD Lugo, Racing Ferrol ou Racing Villalbés e que nos últimos anos defendeu a camisola do Ribadeo, está a adestrar coa SDC Residencia. Nas vindeiras datas saberemos se os branquiazuis contan co veterán xogador de cara á temporada.

Na Primeira Autonómica, a SD Burela recupera a un vello coñecido. Miguel Gomes volve ao conxunto no que se formou. Algo máis ao sur e unha categoría máis abaixo, o Muimenta anunciou a renovación dos seus defensores Julio e Iago.

Por último, no fútbol feminino, a SD Antas prepara o seu novo proxecto de cara á 21/22. A última peza do mesmo será Silvia, que chega ao Castro Seoane procedente do CD Lalín.