Moi probable que moitos afeccionados, cando saiu o calendario da Preferente, miraron en que xornada cadraba o derbi entre Foz e Viveiro. Houbo que agardar sete xornadas, pero á oitava os siareiros da Mariña e de toda a provincia poderán disfrutar dun dos mellores encontros da categoría. O domingo a cita é no Martínez Otero ás 17:30 horas e prevese un gran ambiente con moita afección chegada desde a cidade do Landro. O encontro será arbitrado polo coruñés Ordóñez Rodríguez.
O conxunto focense atópase situado na metade da táboa. Un comezo significativamente mellor que o da pasada temporada, na que os de Gayol retornaron á Preferente moitos anos despois. Coa categoría máis coñecida, e cunha solidez defensiva xa recoñecible, só alterada no encontro ante o Dubra, o Clube Deportivo Foz tan só perdeu un dos sete encontros disputados. Foi o xogado no sempre difícil campo do Carral diante do Sofán. E o calendario non foi bondadoso, enfrontándose xa a Sarriana, Noia ou Arteixo, o que os convertiu no mataxigantes da Preferente. Ademáis, a ter en conta o último triunfo ante o Puebla, invicto ata a visita do conxunto focense.
O Viveiro chega ao Martínez Otero no liderato, co rol de candidato ao ascenso xa asumido desde o comezo de temporada. Malia non gañar os dous últimos encontros, nos que sumou un punto tras empatar en Cantarrana ante o Noia e caer derrotado coa Sarriana, os números dos pupilos de Chusky son espectaculares. Dezaoito goles encaixados e tan só catro recibidos, sendo xunto co Puebla os conxuntos que menos tantos encaixan da categoría.
Aínda que ámbolos dous conxuntos destacan polo seu bo facer en facetas defensivas, a calidade dos ataques sobresairá sobre o céspede focense. Asier, Dani Chao, Miguel Gomes, Gonzalo, Álex Paz por un lado e Gerardo, Álex Meitín, Tichu, Arturo ou Marino por outro deixa entrever moito traballo para os gardametas.
Jesús Gayol, non poderá contar para o encontro do domingo con Cayón, Bruzos e Jacob, todos eles lesionados, mentres que o Viveiro chegará ao derbi co cadro de xogadores ao completo.
O último enfrontamento entre os dous equipos no Martínez Otero saldouse con triunfo visitante. Foi o 3 de febreiro deste mesmo ano e o resultado de un tanto a tres. Bouso marcou para o Foz e Álex Meitín, Xaime e Arturo para o Viveiro.
Falamos do encontro con Dani Chao (Foz) e Marino (Viveiro).
QUE OPINAN OS PROTAGONISTAS?
DANI CHAO (C.D. FOZ)
– A fortaleza defensiva. «Está claro que moitas das nosas posibilidades pasan por ser fortes atrás. Sabemos que en ataque temos variantes e somos rápidos. Imos ter ocasións en tódolos encontros. Por iso deixar a portería a cero daranos moitas opcións de sacar adiante os partidos«.
– O derbi. «Agardo un partido moi moi disputado, con ocasións para os dous equipos e que se decidirá por pequenos detalles. Creo que o Viveiro sairá moi ofensivo, quererá o balón e xogará co equipo moi aberto, pero nós tentaremos ser efectivos coas nosas armas«.
– A madurez do equipo. «Respecto ao ano pasado cambiou a idea que temos da categoría. O ano pasado costounos moito arrancar. Queriamos ter a posesión como en Primeira Autonómica e iso non nos funcionaba. Agora xa sabemos o que é a Preferente e o que costa mantela. Pelexar tódolos encontros os noventa minutos e morrer no campo sendo sólidos en defensa é a nosa premisa«.
MARINO (VIVEIRO C.F.)
– Dúas xornadas sen gañar, pero líderes. «O equipo está ben. As últimas xornadas enfrontámonos a equipos fortes e que sabiamos do seu gran potencial. Sabemos o difícil que é esta categoría e ningún rival nos porá as cousas fáciles, e menos agora que imos líderes«.
– O Foz. «Agardo o típico encontro de derbi. Será un partido moi complicado ante un rival que conta cunha gran plantilla. Compiten moi ben ante calquer rival, e contan con xogadores como Asier, Gonzalo ou Gayol que da nada crean unha ocasión de gol«.
– Segunda temporada en Cantarrana. «A verdade que estou moi contento en Viveiro. Trátame xenial todo o mundo. Esta temporada estou contando algo menos porque o traballo non me permite adestrar tódolos días, pero creo que estou aportando e tentaremos seguir medrando un pouquiño cada día«.
