Jon Vázquez deixou esta semana de ser o adestrador do Chantada Atlético. O club chantadino tomou esta decisión despois dos últimos resultados do equipo e co obxectivo de reactivar ao seu cadro de xogadores. Dese labor encargarase agora o xogador Fran Regal de quen o seu antecesor fala marabillas. Apenas 3 días despois do acontecido, Jon aínda está asimilando unha situación inesperada.

Futbolinlugo: Esperábaste esta destitución?

Jon Vázquez: Para min foi bastante sorprendente. Si que é certo que levábamos tres derrotas consecutivas contra tres conxuntos da parte alta. Ademais nestas tres últimas semanas o equipo estivo bastante mermado xa que sufrimos unha serie de baixas entre lesións e sancións. Aínda así, penso que as sensacións non eran malas. Eu confiaba que agora que o calendario nos poñía en fronte rivais da nosa liga que iamos sacar puntos, pero a directiva decidiu cambiar.

F: A destitución prodúcese unicamente polos malos resultados?

JV: A min o que me comenta o presidente é que o equipo non está onde eles pensan que poden estar. É unha decisión que eu non comparto, pero é algo que lles corresponde a eles.

Once do Chantada Atlético na última vitoria do equipo na casa, ante o Burela

F: Cal é o obxectivo que se che plantexa a comezos da temporada?

JV: A min o obxectivo que se me plantexa é salvar o equipo e intentar, se se pode, igualar a posición do ano pasado. No curso anterior o equipo quedou undécimo pero con dous puntos de vantaxe sobre o descenso. Este ano foi complicado porque xogadores cos que se contaba cando se me ficha a min, ao final non poidemos contar con eles. Houbo varios trocos no cadro de xogadores e andar cambiando durante a liga futbolistas sempre o fai máis complicado.

F: O ano pasado a loita polo descenso estaba máis apretada, que che pareceu o nivel da Primeira Galicia?

JV: É unha categoría que eu non coñecía desde dentro e pareceume bastante atractiva. Todos os equipos che poñen en apuros e hai bastantes xogadores que creo que podían estar xogando noutra división superior.

F: Como ves ao teu subsituto no banco do Chantada Atlético , despois de ser adestrador del?

JV: Para min Fran é unha persoa espectacular. É desta xente que na primeira conversación que tes con el daste conta que é alguén especial. Foi unha pena non poder disfrutar máis del este ano no campo polas lesións. Ten un carisma especial e estou convencido que lle vai ir ben. Deséxolle toda a sorte do mundo.

F: E agora cal é a túa intención para o futuro?

JV: Aínda está todo moi recente, estou en fase de asimilar.  Para este ano xa poucas semanas quedan de competición e quizais sexa o momento de parar e velo desde fóra. E despois o tempo dirá se sae algo por aí.

Comparte

Sobre o autor Ver todos os posts

Iván Calaza

Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

Deixa un Comentario

O teu Email non se publicará. Cubre os campos requeridos*