No caso de que non ascenda na promoción ningún club lucense, todos os descensos directos ou por un hipotético arrastre dos lucenses da Primeira provocarán unha caída a maiores na Segunda. É dicir, os tres descendidos da Primeira lucense arrastrarían no seu grupo de procedencia e, previsiblemente tamén arrastraría un posible descenso da Milagrosa, que participa no grupo da Primeira de Vigo.

A foto de portada é para Marquiños, o porteiro do Quiroga foi un dos destacados en ‘O Noso 11 A Chaira’ da 22ª xornada, que analizamos a continuación.

O Folgueiro terma do liderado

Un dos grandes partidos da última xornada desputada xogouse en Boa Vista. O líder recibía ao 3º. O Folgueiro igualou co Riotorto (2-2), mantense no máis alto con 47 puntos (a espera de que o Iberia recupere o seu partido pendente) e queda con seis máis gol average a favor con respecto ao Riotorto.

Tratouse duns noventa minutos con alternativas e ocasións para ambos conxuntos. Kiños anotou un dobrete ao pouco de comezar. Logo, os visitantes igualaron antes do tempo de lecer por medio de Coedo e de Carreira. Púxolle algo máis de intensidade o Riotorto no segundo tempo, pero o marcador non se movería.

O Iberia desaproveita a oportunidade ante un Muimenta esperanzador

O equipo de San Miguel de Reinante sucumbiu ante o Muimenta (1-1). Co resultado do Vicedo, o Iberia sabía que podía recuperar o primeiro posto (sen ter en conta o partido que aínda ten pendente de xogar). Non obstante, só sumou un punto e queda momentaneamente a un do Folgueiro, ocupa o único posto de fase de ascenso e conta con cinco de marxe sobre o Riotorto e o Celta Barreiros.

Os locais xogaron ben o seu partido e aproveitaron a gran ocasión que tiveron no primeiro tempo. Jairo Gegunde volveu rescatar aos seus e marcou un gran gol. O Iberia acelerou máis o paso no segundo acto, cun incisivo Dani Prieto pola banda. Pisco empatou á hora de xogo.

O cadro visitante acabou desquiciado coas accións de fóra de xogo asubiadas polo colexiado. O marcador non se movería e o Muimenta sumaría un punto que lle permite manterse con opcións de salvación. É penúltimo con 16 puntos, a tres da Piringalla (posible posto de arrastre, ten un partido menos) e a catro do Mondoñedo (posible posto de arrastre).

O Celta Barreiros curta a xeira de vitorias cun Cabreiros tamén invicto en 2025

Cruzáronse os dous equipos da zona norte que non perderan no novo ano na liga e continúan con ese cometido. Iso si, o Celta Barreiros detivo a xeira de cinco vitorias seguidas ao empatar na Acea (1-1). Sitúase na 4ª posición (igualado co Riotorto, que ten un partido máis) e a cinco puntos dos veciños do Iberia.

O Cabreiros comezou mellor e marcou gol aos dez minutos de xogo. Chema Franco non faltou a cita e sumou o seu 18º tanto no que vai de liga. Foi mellorando o conxunto visitante e xa no segundo tempo empataron por medio de Rocky. Despois, os locais acabaron mellor, pero non lograron o tanto do triunfo.

O Cabreiros é 12º con 28 puntos. Conta con certa distancia cos equipos que ten por abaixo. En concreto, ten oito máis que o Mondoñedo (13º). Está empatado co Guitiriz e o Alfoz e atópase a tres puntos da Candelaria.

Con todo, nun hipotético caso, a 12ª posición tamén podería ser de arrastre. Para iso terían que descender tres equipos da Primeira para a zona norte (existe a posibilidade porque no grupo lucense desta categoría poderían baixar en total catro equipos: os directos máis un arrastre no caso de que un equipo galego descenda de 2ª RFEF e acabe implicando unha baixada lucense na Primeira) e que non suba o conxunto deste grupo que xogará a fase de ascenso.

O único gañador dos sete primeiros foi o Casás

O Casás foi o gran triunfador da parte alta na última xornada. Foi o único dos sete primeiros que gañou. Venceu ao Xermade no Municipal (0-2). Mantense na 5ª posición con 38 puntos, a 8 do posto de promoción que marca o Iberia cun partido menos.

O Xermade tivo ocasións para poñerse por diante. O gardamallas rival Raúl estivo acertado e o marcador non se moveu antes do descanso.

No segundo acto, incrementou o seu protagonismo o Casás, que aproveitou un erro defensivo local para adiantarse por medio de Juan. Puido empatar o cadro local, pero o que chegou foi o segundo visitante a través de Cristian, que serviu tamén para sentenciar o partido.

Pola súa parte, o Xermade queda 6º con 34 puntos, máis afastado da zona alta. Pasa por unha mala xeira de resultados con tres derrotas seguidas.

O Sanci quítalle o cartel de invicto á Mina

Segundo triunfo seguido do Sanci, que se converte no primeiro equipo que leva os tres puntos do campo pontenovés. Superou ao Sp. Pontenova por 1-3. Aínda así, o conxunto de San Cibrao queda cun punto menos que o seu rival. É 8º con 32 puntos.

O cadro visitante xogou un partido moi serio. Amosouse seguro defensivamente e fixo valer a súa calidade na parte de arriba. Adiantáronse cedo cunha condución do esférico de Dani, que lle cede o balón a Bruno Lopes e o dianteiro de 18 anos marca, tras protagonizar unha gran xogada.

Ao volver dos vestiarios, os locais empataron. Álex Costea anotou de penalti. Con todo, o Sanci non cambiou a súa idea e obtivo premio. Mediado o segundo tempo, Borja Mella enviou o balón a dentro da portería cun lanzamento de falta. O partido rompeuse e, no tramo final, Nacho sentenciou logo dunha boa internada pola banda dereita.

O Sporting Pontenova é 7º con 33 puntos. Ten un partido pendente de xogar na Mina co Iberia. Antes desta derrota, levaba na casa sete vitorias e dous empates.

A Candelaria dá un paso de xigante cara a salvación

O equipo da Rúa alcanza os 31 puntos, logo de superar á Piringalla (0-4). Queda 9°, a un punto dos seus veciños do Sanci. Conta con catro de diferenza con respecto a décimo segunda praza.

A Candelaria marcou o primeiro nada máis comezar por medio de Manu. Esta situación provocou que a Piringalla tivera que arriscar máis e os visitantes aproveitaron o contragolpe. Pablo anotou o segundo.

Antes de pasar polos vestiarios, Manu volveu marcar para case sentenciar o resultado. Ao pouco de comezar o segundo acto, Manu completaría a súa gran tarde co terceiro tanto.

Logo deste partido, Marcos deixou de ser o adestrador da Piringalla. Andrés Rodríguez é o encargado de darlle a remuda no campo. O ex adestrador da Comercial e membro do corpo técnico do Racing Villalbés debutou con vitoria na Copa ante o Abadín. O equipo é antepenúltimo, cun partido menos, ten tres máis que o Muimenta (descenso directo) e está a un do Mondoñedo.

O Guitiriz suma tres valiosos puntos e iguala ao Alfoz

Triunfo importante do Guitiriz ante o Alfoz (0-1). Segunda vitoria seguida na casa e terceira dos últimos catro encontros xogados. O partido foi igualado sen moitas ocasións no Suso Cruz.

Os locais conseguiron o gol da vitoria nun erro defensivo visitante por medio de Javi ‘Tanketín’. O cadro alfocense tentou a igualada no segundo tempo, pero con máis corazón ca sentido no xogo.

Ambos equipos quedan igualados na clasificación con 28 puntos. Os mesmos que ten o Cabreiros (12°) e con 8 máis que o Mondoñedo e 9 con respecto á Piringalla (posibles posicións de arrastre).

O Mondoñedo cumpre e alcanza os 20 puntos

Despois de oito partidos sen gañar, o Mondoñedo sumou de tres ante o Cospeito (1-0). O resultado permítelle estar por riba da primeira posición de posible arrastre.

Fixo boa primeira parte o Mondoñedo. Dispuxo de ocasións e non as concedeu ao rival. A pesar diso, o resultado non se movera cando chegou o tempo de lecer.

Na segunda metade, o gol de Javi Álvarez deulle unha vantaxe aos locais, que non foron capaces de ampliar.

O San Roque mantense na cabeza por segunda/terceira semana

Co parón de Entroido e Copa, o San Roque enlaza tres semanas no máis alto da Segunda sur. Iso si, ten 47 puntos e está igualado co Santa Comba, o seu próximo rival esta fin de semana. Os pupilos adestrador por Piru enlazan oito xornadas sen perder. Na última impuxéronse ao Friol (2-1).

O conxunto friolés non saíu de todo metido nos primeiros minutos ante o líder. O San Roque adiantouse rápido. Posteriormente, o cadro friolés sóubese impoñer e logrou o empate.

Con todo, o conxunto capitalino volveu tomalo dominio e xa case que non o soltou ata o final. Volveuse poñer por diante e puido sufrir ante o xogo directo do rival, a quen lle perdoou máis goles ao contragolpe.

O Santa non perde a Comba co líder

A unhas horas de que Tras do Novo acolla O Santa Comba – San Roque, segundo contra primeiro cos mesmos puntos, os locais chegan coa mellor xeira de resultados do grupo; cinco triunfos seguidos. O último foi ante O Chantada B por 1-2.

O filial dispuxo da posesión, pero viuse moi presionado na saída do balón polos visitantes. Con todo, Pablo puxo por diante ao Chantada B. Antes do tempo de lecer, nunha acción a balón parado, igualou o Santa Comba.

No segundo acto, o cadro visitante foi práctico, forzou un penalti e conseguiu o tanto do triunfo.

O filial chantadés ocupa a décimo segunda praza, que podería ser tamén de arrastre dependendo de como se dea a situación na Primeira. Ten por diante ao Antas, a cinco puntos. Por detrás, está empatado co Incio, ten un máis que o Rubián e catro con respecto ao Lemos B que marca o descenso directo.

O Brollón, de novo con opcións aos postos de privilexio ao sumar un +6

O Brollón volveu entrar na pelexa polas primeiras posicións ao gañar nos minutos pendentes ao Ferreira (0-1) e ao superar ao Palas no encontro da vixésimo Segunda xornada (0-2).

Foi outra gran fin de semana de Isma. Marcou o gol da vitoria nos minutos que restaban ante o Ferreira, despois de que os locais gozaran de oportunidades de gol. Ao día seguinte, volveu adiantar aos seus para indicar o camiño da vitoria.

O Palas puido poñerse por diante nada máis comezar, pero o pau evitouno. Pouco a pouco, o Brollón foi incrementando o seu nivel de protagonismo. Isma tamén mandou un balón o longueiro.

Na segunda metade, o dominio local acrecentouse. Castro colocou un bo centro que Isma rematou a gol de cabeza. Pouco despois, Damián nunha gran xogada individual puxo o balon na mesma escadra para facer o 0-2.

Comezou ben o Palas, que tivo a oportunidade de adiantarse cun balón ao pau. Á hora de partido o Brollón marcou e a partir de aí todo foi máis fácil para os visitantes.

O Becerreá distánciase minimamente da cabeza

Con dúas xornadas sen gañar, o Becerreá queda a cinco puntos dos dous primeiros postos. Empatou na casa co Portomarín (2-2).

O Portomarín marcou o primeiro no Municipal por medio de Bilal, que xogou o seu último partido por motivos laborais. Os locais espabilaron no segundo tempo e lograron a remontada momentánea cun dobrete de Kevin. No tramo final, a balón parado, Yeray volveu empatar o partido.

O Portomarín atópase na zona media da táboa con 30 puntos, dez de marxe con respecto a posibles posicións de arrastre.

O Paradela supera os 40 puntos

Con 41 puntos plántase un Paradela que segue na quinta praza, a seis do San Roque e do Santa Comba.Foi moi superior ante o Lemos B (5-0). Tras adiantarse con gol de Albertito, Samos e Romy anotaron cadanseu dobrete.

O filial lemista queda en descenso, a tres puntos da antepenúltima posición.

1/6 para o Ferreira que revitaliza ao Quiroga

O Ferreira perdeu a oportunidade de recuperar postos na táboa. Na mesma fin de semana recuperou os minutos pendentes co Brollón e perdeu. Xogou o partido correspondente co Quiroga e empatou.

O Ferreira controlou maiormente o partido. Púxose por diante no primeiro tempo. Antes do tempo de lecer, o Quiroga igualou por medio de Brian.

Os locais xeraron numerosas oportunidades para gañar, pero sobresaíu Marcos, o gardamallas visitante luciuse con paradas de mérito.

O Quiroga continúa de pechacancelas con once puntos. Está a oito do antepenúltimo.

O Antas suma tres puntos clave pola permanencia

O Antas foi superior dende o inicio ata o final. Venceu 3-0 a un O Páramo que Ainda así, segue con tres puntos máis na clasificación que o seu rival.

O Páramo non foi capaz de poñer en apertos ao rival. Centro de Germán e gol de Besteiro, centro chut de Goleta para o segundo. No segundo tempo, sentenciou o Antas a través de Louzao.

O Rubián vence ao Incio e encarece a salvación

Encontro moi desputado dende principio a fin. No primeiro acto, o Rubián dominou co balón, aínda que O Incio aproveitou algún despiste local para xerar perigo. As ocasións escaseaban no segundo tempo ata que, tras unha xogada trenzada, Álex, que saíra dende o banco, recolleu un rexeite e marcou o gol que lle deu os tres puntos o Rubián. Os visitantes tiveron unha clara para empatar por medio do balón parado, pero a fortuna non estivo do seu lado.

Na clasificación O Incio queda cun puntos máis e o gol average queda empatado.