Xa na segunda metade, o CD Lugo mellorou, creando ocasións máis claras. Cando o equipo albivermello estaba mellor e o empate semellaba preto, cometeron un erro na saída dende atrás que lles custaría o 0-2. Aínda co resultado na contra, o equipo non deu todo por perdido e seguiu loitando, facendo uns últimos 15 minutos moi bos, rozando incluso o empate.

Partido de mérito para o filial friolés ante as líderes da categoría, o Xallas, aínda que de novo sen o premio do resultado.

As friolesas chegaban con moita ilusión a este partido no que se enfrontaban ás líderes e coa espiña cravada do partido da primeira volta, no que perderan malia facer un gran encontro e no que o resultado máis xusto, quizabes, era o empate.

Nesta ocasión o guión foi distinto. Na primeira parte o PM Friol B puido adiantarse no marcador nunha ocasión moi clara de Carla. O campo do Xallas perxudicaba o xogo friolés ao ser moi ancho, o que facilita que as xogadoras locais aproveiten a súa velocidade para facer dano pola banda. Porén, a situación foi solventada grazas a un bo plan de partido e un mellor traballo defensivo. O Xallas apenas tivo ocasións claras en case todo o partido.

O único gol do encontro chegaría dun mal rexeitamento do Friol que Olalla, probablemente unha das mellores xogadoras da categoría, engancharía para por un disparo imposible de parar para a porteira friolesa.

O PM Friol seguiu co seu guion inicial e no minuto 70 intensificou a súa presenza arriba para tentar de facer dano ó Xallas. Así chegou unha ocasión clara de Carla pero o empate non puido darse malia as innumerábeis oportunidades claras de gol que tiveron as friolesas e incluso xogadas bastante discutíbeis que remataron por impedir que o Friol sumara – merecidamente – puntos neste encontro que, quizais, puido incluso gañar.

Magnífico partido das friolesas que deixan ao seu adestrador moi orgulloso do traballo realizado e da evolución que está a ter este equipo, competindo de ti a ti coas líderes e claras candidatas ao ascenso: o Xallas.

Derrota a domicilio para o CD Lugo ante o Sporting Burgo por un contundente 5-2. Ás luguesas custoulles moitísimo meterse no partido, condicionadas por un campo de dimensións moi pequenas nas que as albivermellas non eran quen de atopar os espazos e xogar como saben. Iso, unido aos seus propios erros fixeron que esa primeira parte do partido quede para o olvido.

Xa na segunda metade fomos quen de ter máis opcións e o Lugo anotou os dous goles que recurtaban diferenzas e que puideron ser máis. Porén, o Sporting meteuse atrás a defender o resultado o que impedía chegar perigosidade á meta contraria.

Houbo tormenta pero non foi para o Lóstrego. As xogadoras seoanesas dominaron o partido na casa rematando cun claro resultado a favor: 5-0.

Un bo inicio de partido cunha presión moi alta fixo que o cadro ulloán fora unha ameaza constante para a meta visitante. As ocasións eran contínuas, pero a falta de acerto de cara a portería evitaba que puideran porse por diante no marcador. Un bo centro de Jenny rematou nas botas de Marta, que empurrou o balón ao fondo da rede para abrir o marcador.

Jenny e Iria anotarían tamén na primeira parte para marchar ao descanso xa cun 3-0 no luminoso. Foi Jenny quen, de novo na segunda parte, fixo outros dous goles para rematar cun hat-trick particular grazas a dous golpeos de mérito dende a frontal da área.

Un novo partido de ensoño do Antas para colocalas como líderes da clasificación, dous puntos por enriba das súas inmediatas seguidoras: o AT Villalonga.

Nova xornada e nova derrota da SD Chantada, que non levanta cabeza. No primeiro minuto o Touro xa anotaba por medio de Nerea e dende ese momento sucedéronse os goles para rematar perdendo 0-11, con 6 goles a favor do Touro antes de chegar ao descanso.

As chantadesas saltaron ao verde cun equipo dunha media de 19 anos e poucos meses adestrando con regularidade. Tempos de transición no Sangoñedo.

Un duro resultado de novo para a SD Chantada que se afunde se coloca como pechacancelas da clasifición con só 2 vitorias e 2 empates en 20 partidos. Porén, a permanencia non está demasiado lonxe. O Bandeira, equipo que marca o límite dos postos de descenso, está a tan só 2 puntos das chantadesas.

O Santiso impúxose con claridade no Luis Bodegas: 0-5. As monfortinas sabían xa que ía ser un partido complicado, e así foi. A lesión de Noa aos poucos minutos de comezar o encontro condicionou os plans de partido e todo o que sucedeu despois.

Aínda que o Monte Forte tivo algunha ocasión na primeira parte, quen soubo aproveitar as súas foi o Santiso. Os problemas só ían medrando para o Monte Forte que, no minuto 60 quedou cunha xogadora menos por lesión e sen ter cambios suficientes. No 70, outra xogadora caeu lesionada o que obrigou ao equipo a rematar o partido con 9.

Partido completametne dominado polas locais (Milagrosa) que en todo momento foron moi superiores ao Órdenes que apenas tivo ocasións. Os goles chegaron das botas de Aurora (38′), Lucía (57′) e Leire (90′) para pechar o encontro co definitivo 3-0.

Primeira parte de ti a ti no derbi lugués a pesares de que xa antes do descanso gañaba o San Lázaro 0-1 grazas a un tiro lonxano de Morgan. Porén, o partido estaba moi igualado, con ocasións tamén para a Comercial que chegou varias veces á portería contraria atopando a unha gran porteira baixo paus. Aínda así, a Comercial poría o empate no 37 grazas a un gol de Margarita. Pero de novo antes de chegar ao descanso, Anita anotaría para marchar aos vestiarios con vantaxe para o seu equipo: San Lázaro.

Xa na segunda parte, ao pouco de comezar o San Lázaro meteu outro gol pero a Comercial seguía saíndo ao ataque. O San Lázaro saiu coa idea clara de ter especial coidado nas saídas de balón e non perder o esférico no inicio das xogadas xa que a Comercial apertaban bastante e ben.

O San Lázaro tiña problemas para atopar ás súas xogadoras arriba e tivo a sorte de que un gran disparo dende 30 metros dunha xogadora do Comercial se atopase coa madeira e non coa rede.

O partido desequilibrouse cando a Comercial tívose que quedar con 10 ao pouco de que o San Lázaro anotara o 3º gol dada a lesión dunha das súas xogadoras, Aroa, e a falta de cambios.

Con unha máis, o San Lázaro veuse arriba e xogou moi cómodo, atopando moitos espazos e sabendo aproveitalos.

Os goles de Douaa (69′), Irene Rebolo (85′) e de novo de Morgan (86′) rematarían pechando definitivamente o marcador do encontro: 1-5 cun abultado resultado pero que non é fiel coa realidade dun partido moi igualado.

Non foi o día para as guerreiras no Catro Ventos. O partido ante o Cruces non comezou nin ben nin mal, pero mudou ao completo cando se adiantaban as visitantes. Dominando no luminoso o Cruces, ao Carballedo enchéuselle a cabeza de dúbidas das que non conseguían saír coas ideas moi nubaradas, sen que nada fose ao dereito.

Deste xeito, o partido chegaba ao descanso cun 0-4 e moi malas sensacións. Dende o banco, o corpo técnico tratou de mudar o sistema para atopar mellores sensacións, pero tampouco funcionou. O final do partido chegou co 1-7 e coa certeza de ser unha xornada para aprender dos erros e tentar que non volva pasar.

Esta fin de semana o Carballedo para (non ten partido aprazado polo temporal) e viralles ben ás de rosa para recuperar lesionadas e preparar o seguinte partido.