O Foz conseguiu unha das maiores xeiras sen perder de toda a tempada no fútbol galego. Os da Mariña Lucense conseguiron estar un total de 16 encontros na Primeira Futgal sen coñecer o que era a derrota. En datas, o Foz foi un equipo invicto dende o 3 de novembro ao 23 de marzo, un total de 140 días. Toda esa xeira na que acumularon 11 vitorias e 5 empates fai que o conxunto que dirixe Pelayo Barrero se sitúe sexto nunha posición tranquila da táboa a 12 puntos da promoción de ascenso con dous encontros menos.

Un comezo complexo para o Foz

A xeira xa rematou tras a derrota ante o Guntín por 3-1, pero o comezo desta foi algo chamativo. Antes do empate ante o Lourenzá por 2-2, o Foz levaba catro derrotas consecutivas, a última por 0-3 ante a Residencia. Pelayo, adestrador do clube, afirma que «ao principio tiñamos un cadro de xogadores moi curto e estabamos pendentes dos xogadores que pararan o ano pasado para que voltasen». Ademais, tiveron baixas de longa duración coma as de Lucas e Aarón, que se perden toda a tempada.

Iso sumouse a un tramo da tempada moi complicado, pero o Foz nunca parou de competir en ningunha das catro derrotas que tiveron antes da xeira. «Aínda que tiñamos xogadores con lesións musculares pola carga de minutos e que tiñamos rivais da zona alta, os xogadores sempre deron a cara e loitaron ata o final para sumar puntos en todos os partidos», destaca Pelayo.

Un cambio de tendencia radical

A chegada de reforzos coma Chao ou Manolo e a recuperación dos xogadores que tiñan problemas musculares provocaron que o Foz comezase a gañar encontros e iniciar unha xeira que durou ata o pasado fin de semana. Pelayo apunta que «a chave foi o máximo compromiso de todos e a intención de plasmar todo o que adestrabamos durante os noventa minutos dos encontro, sobre todo incidindo pola miña parte nos plans de partido que definimos».