A borrasca Fabien privounos do duelo entre Folgueiro e Monterroso. Non así do resto da xornada. Así que, con todos vós, o noso agasallo de Noiteboa: Os resumos e os Máxicos da Data 16.
*Outeiro de Rei-Chantada Atlético: Goles, intensidade e emoción ata a baixada de telón. Un Chantada Atlético perigoso na transición defensa-ataque abriu a lata nun testarazo a unha falta botada por Anxo. Un bo Outeiro fixo tres goles para remontar antes do descanso, a base de centros laterais e unha xenialidade de Dani Renda a balón parado. Na reanudación, os de Josito Jul non foron capaces de matar o partido. E deixaron con vida aos de Fran García, que nunca deixaron de crer. E finalmente acadaron a igualada nunha boa xogada combinativa e nun penalti transformado por Adri.
*Guntín-San Roque: O vento e o estado do terreo de xogo propiciaron un partido de marcado xogo directo. Nunha primeira metade disputada, o Guntín abriu a lata nunha indecisión dos capitalinos. Núñez devolvía as táboas ao marcador nun saque dende o curruncho. Tralo descanso, os de Martín mostráronse mellores nese xogo directo, dispuxeron de varias ocasións de gol. Porén Roi e a falla de puntería local, demoraron o gol do triunfo ata o minuto 84. Obra de Iván nun córner.
*Burela-Friol: Encontro feo, igualado e sen apenas ocasións que se decidiu por unha xenialidade. Un lanzamento de falta directa de Diego Chao a menos de dez minutos para o remate, bastou para deixar os tres puntos na Marosa. Os pupilos de Antonio Abad non atoparon o camiño do gol nunha tarde compricada no atmosférico e no verde.
*Atlético Escairón-Lourenzá: Alternativas nun duelo con moita máis cafeína da que semellaba. O líder impuxo a súa lei con dous goles e superioridade manifesta na primeira media hora. Un tanto do Lourenzá antes do descanso animou aos mariñáns, que igualaron a pelota parada antes do cuarto de hora da segunda metade. Macía evitou o 2-3 dun colista que rozou o empate no Saviñao. No entanto, os homes de Montoto sacaron réditos a tempo. Julito pescou en río revolto e deixou os tres puntos na casa despois dunha serie de rexeites.
*Pastoricense-Pol: Sorpresa no Acebreiro. O Pastoricense saiu do descenso directo despois de impoñerse a un dos conxuntos máis en forma da competición. A fórmula de contragolpe e balón parado saiulle redonda aos de Fran Veiga, que conqueriron os seus dous goles na primeira metade. Os de Fernando Corredoira nunca se atoparon cómodos ante o xogo directo, perdendo moitísimas segundas xogadas. E aínda que o balón foi dos visitantes no segundo tempo, o Pastoricense puido rematar goleando.
*Chantada-Castro: O acerto e o vento mandaron no Sangoñedo. O Chantada fixo bo ao descanso un solitario gol ao cuarto de hora. Tras o paso polos vestiarios, os de Juan Rodríguez castigaron os erros defensivos dun notable Castro. E puxéronse 3-0. Lonxe de dar o encontro por rematado, os de Vitín mostraron unha soberbia reacción. Chegando a poñerse a un só tanto no minuto 91, e con dez homes pola lesión de Fede (xa estaban todos os cambios feitos). Os do Sangoñedo remataron pedindo a hora ante un Castro que morreu na beira.
*Santaballés-Riotorto: O Santaballés rematou o ano ligueiro do xeito que mellor sabe: ganando con oficio. Os de Dani Moirón abriron a lata nada máis comezar nunha indecisión entre Juanmi e a defensa visitante. Un soberbio Riotorto empatou no ecuador dunha primeira metade na que tivo un pau e un claro man a man errado. No segundo tempo, os de Suso Orxás topáronse co longueiro ante un rival que lle custaba chegar con perigo. No entanto, a expulsión de Ferreirós puxo o panorama máis de cara para os chairegos. Que se fixeron co triunfo no tramo final, nun tanto nun saque dende o curruncho.
*Xove Lago-Taboada: Un espectacular Xove Lago sobrepúxose a todo o que se pode un practicamente sobrepoñer. Chegaba ao encontro con baixas clave, lesionóuselle Luis Varela e quedou con dez homes ao minuto 9 por unha suposta agresión de Eric. Aínda así, tivo contra as cordas ao Taboada. Meteu medo ao seu rival a balón parado e coqueteou co triunfo. Se ben é certo, que os de Manu desperdiciaron a súa oportunidade. Saíron moi enchufados ao comezo do segundo tempo e, sobre todo, cun longueiro de Fabio na prolongación.
