O Sanci é 9º con 26 puntos. Sitúase a quince do posto de promoción e con nove de marxe con respecto á antepenúltima posición. Recuperará o partido pendente co Xermade o sábado 22 de marzo, xa que é unha finde na que se prevén os oitavos de final de Copa, pero ningún destes clubs está vivo na competición.

O Iberia volve ao seu

Logo de non poder xogar na anterior xornada, o Iberia tiña gana de resarcirse da primeira e única derrota polo momento da temporada. Superou ao Casás (4-0) e queda a dous puntos do líder cun encontro pendente. A praza de play off tena cuberta ata agora con sete puntos de marxe co Riotorto (un partido máis), o Xermade (un encontro pendente) e o Celta Barreiros (tamén un pendente).

A primeira gran oportunidade do partido foi para o Casás, por medio de Cristian, pero Alonso fixo unha boa parada. A xuventude reivindicouse no cadro preparado por Moro. Carlos (2005) adiantou aos seus cun disparo dende a frontal. Acto seguido, Borja Fernández de Remourelle (2003), que moveu o seu posto habitual de central a mediocentro, marcou tras un córner.

No segundo acto, tentouno o Casás, pero cos goles de Jorgito (2007) e novamente de Borja os locais levárono con tranquilidade.

O Casás é 7º con 29 puntos. Ten un partido máis, está a doce da praza de fase de ascenso e conta con doce puntos de diferenza co antepenúltimo posto.

O Riotorto non ten piedade do Cospeito

Gústalle o gas ao vestiario do Riotorto, á vista das últimas peticións dun dos seus capitáns nas redes sociais. O gas e os goles, porque venceron por 8-0 ao Cospeito na Veiga. É a segunda maior goleada do curso que encaixa o club cospeités logo dos nove que lle marcara o Iberia.

Precisamente, un dos portadores do brazal no Riotorto, Manu Carreira, foi un dos protagonistas do xogo ao anotar un hat-trick. O ex xogador do Lemos e do Escairón, entre outros, acumula nove tantos na súa 5ª temporada no conxunto riotortense.

Tamén marcou un dobrete Saad, e cadanseu tanto Foad, Iván López e Borja Silvosa.

O Cospeito é último clasificado con tres puntos. Este resultado supón un baixón con respecto á liña amosada nos últimos encontros, onde estivera a piques de puntuar.

Sergio Vila desequilibra a favor do Xermade

O club xermadés continúa igualado co Riotorto (un partido máis) e co Celta Barreiros a 34 puntos. A praza de promoción de ascenso segue estando a sete, grazas a que o Xermade venceu 0-1 ao Alfoz. É o cuarto equipo que gaña este curso no Municipal. Antes fixérano o Mondoñedo, o Folgueiro e o Celta Barreiros.

Con todo, o encontro foi moi igualado e ningún dos equipos dispuxo de moitas ocasións. No tramo final, a diferenza marcouna Sergio Vila. O dianteiro, nado en Ferrol, marcou un bo gol cun lanzamento dende lonxe.

O sábado 22 de marzo o Xermade recuperará na casa o encontro pendente co Sanci.

O Alfoz é 9º con 27 puntos. Sitúase a 14 da promoción (un partido máis) e a dez do antepenúltimo.

O Celta Barreiros gaña todo en 2025

Non puido xogar por mor do temporal de inverno, pero o club do Cascabeiro non baixou o ritmo en 15 días sen encontro oficial. Superou ao Mondoñedo (4-2) e mantense nos postos cabeceiros. Enganchado agora ao tren dos 34, o posto de promoción de ascenso está a 7 puntos.

O partido púxoselle de cara aos locais, que dominaron máis con balón. Antón marcou, tras unha boa xogada colectiva e, ao pouco, Javi Andina fixo o segundo.

No inicio do segundo tempo, parecía que o Mondoñedo se podía meter no partido. Javi Álvarez anotou de penalti. Non obstante, o Celta Barreiros non lle deixou marxe. De seguido, Casanova puxo o terceiro no marcador. En nada, Javi Andina sentenciou o partido co cuarto. No tramo final, Vázquez logrou o segundo visitante.

O Mondoñedo é 14º con 17 puntos, ten cinco de marxe co descenso directo e está a tan só un punto de salvar a primeira posición de arrastre.

O Sp. Pontenova aínda quere engancharse arriba

Segunda vitoria do 2025 para o conxunto pontenovés. Venceu 0-3 á Piringalla e sobe á 6ª praza con 30 puntos. Ten un partido pendente de xogar co Iberia que o podería aupar a estar máis arriba no tramo final de liga. Agora mesmo está a 11 puntos do club de San Miguel de Reinante.

Foi un encontro que comezou igualado, aínda que Presno si detivo unha boa ocasión local. No segundo tempo, tentoulle imprimir máis ritmo o Sporting Pontenova, pero o gol non chegaría ata que o partido entrou no tramo final. Marcou Pasarín, ao pouco, Costea anotou o segundo nun penalti.

Logo os locais quedaron cun meno pola expulsión de Pipi. Adrián sentenciaría o resultado co terceiro gol.

A Piringalla é 18ª con 18 puntos, seis máis que o descenso directo e un sobre o antepenúltimo clasificado.

O Cabreiros, o equipo máis en forma da zona baixa

10 puntos de 12 posibles. Son os números que presenta o Cabreiros en 2025. Ademais que son puntos que se revalorizan porque foron ante rivais directos. De feito, ten o gol average gañado xa co Muimenta e coa Piringalla. Iso si, quédalle igualado coa Candelaria, a quen derrotou a pasada finde por 1-2 en plenas festas da parroquia da Rúa. Os pupilos preparados por Isaac Rouco ocupan a 11ª posición con 23 puntos, a dous do seu rival e seis de diferenza co antepenúltimo.

Chema volveu ser protagonista e puxo por diante aos seus. Antes do tempo de lecer, Joan realizou unha boa xogada individual para facer o segundo. Non logrou o terceiro o cadro visitante, e os locais quixeron meterse no encontro. Tinga marcou preto do 80 nunha acción protestada polos rivais. Poucos minutos despois, o ábitro asubiu tamén un penalti discutido polo Cabreiros. Puido igualar a Candelaria pero Nesi estivo atinado baixo paus.

A Candelaria é 10ª con 25 puntos.

O Guitiriz volve gañar

Dende novembro, o cadro guitiricense non lograba a vitoria. Dende aquela, catro empates e dúas derrotas. Con todo, logrou os tres puntos nun dos días máis importantes. Venceu ao Muimenta (1-3) e deixa o descenso directo a dez puntos.

O conxunto local saíu xa de inicio con Manu, xogador de campo, como porteiro. O vilalbés tomou a responsabilidade ante a ausencia de Cancio e Antonio, ademais de Noche (lesionado de longa duración). Non tivo excesivo traballo, pero o Guitiriz foi efectivo nas accións das que dispuxo.

Os locais non estiveron atinados e o conxunto guitiricense marcou ao pouco de comezar o segundo acto. O Muimenta logrou igualado por medio de Pablo, pero o rival respondeu moi rápido con goles de Mauro e de Antón.

O Muimenta é penúltimo con 12 puntos, a cinco de quedar fóra do descenso directo.

O San Roque regresa ao liderado

Conseguiuno durante unha semana en xaneiro, e agora o equipo preparado por Piru volve ao máis alto da clasificación. O San Roque venceu ao Lemos B (1-3) e aproveitouse do empate do Becerreá. A liga está igualadísima, tanto que é complicado describila con palabras. E tan só hai dúas prazas en xogo: unha de ascenso directo e outra de promoción.

Saíu ben o San Roque no primeiro tempo e foi contundente en ambas áreas. Marcaron o central Raúl e Diego Alvariño. Con todo, no inicio do segundo tempo, o filial aproveitouse dun erro rival para meterse no partido. Pouco a pouco, o San Roque volveu ter o control e sentenciou cun tanto de Jul.

O Lemos B caeu a zona de descenso directo por mor do triunfo do Rubián. O filial lemista é 15º con 13 puntos, a tres de fuxir da zona de máis perigo.

O Becerreá queda a espera

Dende que volveu a liga en 2025, o líder non dura máis dunha semana. Nese cambio constante, tocoulle ao Becerreá saír do primeiro posto. Empatou sen goles na súa visita ao filial da SD Chantada. Queda a dous puntos do líder, igualado co Santa Comba e con dous máis que o Ferreira (que ten un partido pendente de rematar).

Non houbo moitas oportunidades nun partido no que o Becerreá dominou máis ao comezo. No segundo acto non cambiou moito a tónica, ambos gardamallas estiveron seguros baixo paus.

O Chantada B é 12º, con 17 puntos. Non perde en 2025. Sumou 8 de 12 posibles. Conta con catro de marxe sobre o descenso directo e tan só un con respecto á antepenúltima praza.

O Santa Comba continúa superándose

Décimo segunda vitoria do curso para o Santa Comba, recén ascendido e que semana a semana se revaloriza como a revelación da liga. Venceu ao Quiroga (2-1) e queda a pré coa praza de promoción de ascenso. O liderado está a dous puntos.

O encontro comezou igualado cun Quiroga intenso. Rematou mellor o Santa Comba e comezaron tamén ben o segundo tempo. Con todo, foron os visitantes quen se adiantaron no marcador por medio de Mavilo. A partir de aí, o Santa Comba apertou e logrou a remontada.

O Quiroga continúa como último clasificado con 10 puntos. Coa vitoria do Rubián, saír do descenso directo está a seis puntos.

Seis goles no Chao da Poza

O Ferreira queda na 4ª posición, logo de empatar na casa do Portomarín (4-4). A falta de que remate o seu partido pendente co Brollón, o cadro de Pantón ten 36 puntos, a catro do líder.

O Ferreira foi superior na primeira metade e marchou gañando ao descanso 1-2. Cambiaron as tornas no segundo tempo. Os locais foron mellores e chegaron a remontar o partido. No último tramo de xogo, o cadro de Pantón logrou a igualada.

O Portomarín é 8º casificado con 26 puntos. O posto de promoción está a 12, mentres que co antepenúltimo posto ten unha vantaxe de 10. Nas últimas horas, o cadro preparado por Diego Rey reforzouse coa chegada de Carlos Pacín. O mediocentro chega procedente do Guntín de 1ª Futgal, pero xa coñece a varios dos que volven ser os seus compañeiros ao coincidir con eles estas últimas campañas na Comercial.

O Paradela, único derrota dos de arriba

O Paradela non puido co Incio nun duelo de oito goles, que levou o cadro amarelo por 5-3. Os pupilos adestrados por Santy López quedan no 5º posto con 34 puntos, a seis do líder. Pola súa parte, os tres puntos son moi necesarios para o Incio. Son 13º con 17 puntos, un máis que o antepenúltimo e catro de marxe co descenso. É o primeiro triunfo de 2025 e o quinto da tempada para os do Carboeiro.

Na primeira metade os visitantes responder con gol das dúas veces que o Incio se puxo por diante. Avanzado xa o segundo tempo, chegaron os restantes catro goles. Volveu acontecer a tónica da primeira, marcan os locais e empata o Paradela.

Con todo, nos intres finais foi decisivo o papel de Roi López que entrou no segundo tempo. En dúas xogadas pola banda dereita, fixo valer a súa velocidade e logrou dous tantos para os seus.

O Incio dedicoulle o triunfo a Xosé. O defensa de Saa tivo que marchar en ambulancia o venres anterior no adestramento. Está pendente de probas, pero a lesión semella grave nun xeonllo. Dende aquí, todo o noso ánimo.

O Brollón recupera sensacións nos Medos

Aínda co encontro pendente de terminar co Ferreira, o Brollón non coñecía a vitoria no 2025. Logrouna na casa ante o Antas (2-0). Queda con 33 puntos, a sete do líder.

O gardamallas local Álex actuou moi ben nas dúas oportunidades máis claras que tiveron os visitantes no primeiro tempo. Pouco a pouco, o Brollón foi controlando máis o partido, cunha melloría notable na segunda parte

Á volta dos vestiarios, Damián marcou de falta directa. Seguiron insistindo os locais que aumentaron a súa vantaxe con tanto de Miguel a pase de Tourón. Nos últimos minutos, o Brollón fallou un penalti.

O Antas é 11º con 19 puntos. Conta con seis de marxe con respecto ao descenso directo, pero o antepenúltimo posto está tan só a tres puntos.

O Friol corta a xeira de vitorias, pero leva 8 sen perder

Seis vitorias consecutivas acumulaba o Friol nos últimos tempos. No seu mellor momento da temporada en canto a resultados, o cadro friolés empatou co Páramo (3-3). Se fora en tempadas anteriores estaba seguro na pelexa (ata o 5º xogaba play off), pero as circunstancias complícanse co novo método deste curso. O Friol é 7º con 31 puntos, a sete do 2º, único equipo que xoga a fase de ascenso.

Un gol para cada equipo nos primeiros dez minutos. A partir de aí o Friol dominou e marcou dous tantos máis antes do tempo de lecer. Non deu atinado máis, a pesar de ter ocasión. No tramo final do partido, Juan erixiuse salvador do club da súa vila e marcou dous tantos que lles deron o empate.

O Páramo é 10º con 26 puntos, conta con 10 de vantaxe sobre o antepenúltimo e atópase a doce do segundo.

O Rubián sae do descenso directo a costa dun Palas en mala xeira

Os pupilos preparados por Senén López lograron o cuarto triunfo do curso. Venceron ao Palas (4-3) e conseguen tres puntos que lles dán aire. Ocupan a antepenúltima posición (que non está exenta de descenso), teñen tres de marxe coa zona de perigo vermella e están a só un punto dos seus dous antecesores.

Goles e de calidade os que se marcaron no Poste. Os locais sempre foron a remolque dun Palas que se puxo dúas veces por diante no marcador por medio de Tenerife. Antes do descanso o Rubián logrou o 3º, pero o Palas igualou o comezar o segundo tempo.

Ao redor do minuto 80, Álex, cun tiro dende lonxe, logrou o tanto que significou os tres puntos.

O Palas é 9º con 26 puntos (igual que o Portomarín e o Páramo). O peor é a xeira de cinco derrotas consecutivas.