Diego Núñez (Muimenta): "Notei que era voltar agora ou nunca"

Diego Núñez (Muimenta): «Notei que era voltar agora ou nunca»

Eros López / 13 horas

3min de lectura

O Muimenta, penúltimo clasificado na Segunda Futgal a catro puntos da salvación, está facendo movementos para intentar xogar unha tempada máis na categoría. Destaca o nome de Diego Núñez, quen xa debutou na pasada xornada ante o Alfoz con derrota por 1-0. Un xogador mítico do fútbol lucense co seu paso por equipos coma a Sarriana, o Viveiro ou o Ribadeo que agora vive a súa primeira experiencia no fútbol senior na categoría. Ademais, o Muimenta tamén ficha a Dapo para dar máis nivel a un cadro de xogadores que busca a permanencia.

Futbolinlugo: Como se deu a oportunidade de fichar polo Muimenta?

Diego Núñez: Foi de casualidade. Dende comezos de ano tiven chamadas de Preferente e de Primeira Futgal para ir pero eu non me vía con confianza nin co ritmo suficiente para poder xogar. Ademais, fai un ano que me lesionei de gravidade e iso fixo que lles dixera a todos que non. Por medio dun amigo en común chamoume o adestrador e díxome que o ritmo non era comparable pero que podía botar unha man ao equipo e probarme a min mesmo por se no futuro podo seguir. Falándoo na casa pensei que era agora ou nunca.

FIL: Como te atopas agora?

DN: Teño unhas sensacións raras. Véxome moito máis limitado, a veces a nivel mental polo medo e as sensacións. Pero sendo realista despois dun ano parado e con dous adestramentos completar un encontro pois é algo a valorar. Por un lado son boas por volver a tocar balón e outras malas porque non son nin a metade do que era.

FIL: É a túa experiencia coma senior na Segunda Futgal. Que che está sorprendendo da categoría?

DN: A verdade é que inda que a nivel técnico é menor que na Terceira ou na Preferente si que vexo que a nivel físico, de sacrificio e de compromiso é igual ou superior. É de destacar porque non cobran e non paran de correr. Esperaba poder xogar tranquilo pero nada deso.

«Ao Muimenta quero aportarlle traballo e sacrificio»

FIL: Que cres que lle podes aportar ao Muimenta para alcanzar a salvación?

DN: Traballo, experiencia e sacrificio, que foi o que sempre lle din a todos os equipos nos que estiven. Se caera algún gol viría xenial porque penso que facer tres puntos é o que lle fai falta ao equipo para ter confianza. En encontros coma os de Alfoz falta ese punto de confiar en si mesmo ao clube. Se chego eu e o dou todo e lles aporta confianza, benvido sexa.

FIL: Tedes un encontro complicado ante un dos competidores polo ascenso, o Celta Barreiros. Como chegades ao partido?

DN: Sabemos o que eles se xogan, pero nos temos unha loita moito máis importantes. Sei o que é ascender e descender e subir é fermoso pero baixar é moi fastidiado. Eles están apretados, pero nós non vai ser menos. Temos que saír a por todas porque temos moito máis en xogo.