Semella que o mercado aínda ten actividade por diante, pois entrado o mes de agosto seguen chegando novidades ao noso buzón. As primeiras, na Preferente Norte. O recén ascendido Castro incorpora ao porteiro David Martínez ‘Bugy‘ (a temporada pasada estivo a primeira metade da temporada no Racing Villalbés) que lle fará a competencia ao renovado Josema para defender as redes do Arturo Pereiro.
Ademais, o dianteiro navarro David Echevarri é novo xogador do As Pontes, logo de competir coa elástica da Sarriana na pasada 22/23.
Na Primeira Galicia, o Portomarín suma ao seu proxecto a Yaguito. O habilidoso xogador atopábase inactivo logo dunha lesión de xeonllo, pero xa sabe o que é destacar coa camiseta do San Roque ou na base da Residencia. Ademais, o Santaballés renovou a Miguel Ángel Folgueiro ‘Play’. O contrastado futbolista vestirá por segundo ano consecutivo a elástica dos da Liga.
Porén, os chairegos perden a un importante activo dos últimos anos. Hugo López deixa o Santaballés para enrolarse na disciplina do Racing Villalbés ‘B’. O atacante xa sabe o que é xogar no Roca, onde competiu na División de Honra xuvenil. O filial chairego tamén contará un ano máis con Cadra, prometedor defensor do Xistral que xa sabe o que é xogar co primeiro equipo e participar de forma activa nos adestramentos de Simón Lamas.
Outro conxunto da Terra Chá, o Cospeito, renovou a Adrián Paredes, Dani Río e Álex Rábade. Xa na Terceira Galicia, o Castroverde «rouba» talento do Becerreá xuvenil. O gardamallas Iago e o mediocentro Noel xogarán no conxunto adestrado por Fran Veiga. Por último, o Carballedo anunciou a renovación do gardamallas Fran e de Corneta.
Xa para rematar, traemos unha noticia das que non nos gusta dar. O Fonsagrada Balompé non sairá a competir na 23/24 por falta de xogadores para dar continuidade ao proxecto. Logo da desaparición do Castro B, era o club fonsagradino a quen lle correspondía permanecer en Segunda Rexional.
Dende o club din que se vían cun cadro escaso de xogadores e coa maioría deles estudando e vivindo fóra pola semana. Aseguran que se intentou buscar algún futbolista máis, aínda que non se deu consolidado un equipo de garantías. Aspiran dende o Fonsagrada a volver ao fútbol sénior cando podan contar con outras xeracións que teñen agora na base.
Seguindo a dinámica anterior, espérase que a praza no grupo norte de Segunda Rexional lle corresponda o Roupar. Agardamos que as bancadas do Gómez Besteiro podan desfrutar do noso fútbol afeccionado de novo o antes posible.
