Comezamos este novo episodio do noso Diario con Nerea Lombardero como protagonista. A xogadora da Pontenova, que participou nos dous últimos All Star Futbolinlugo, non continuará no PM Friol poñendo así fin a cinco anos de carreira no equipo da Reigosa ao que chegou con tan só trece anos. A vindeira campaña xogará no Viajes Interrías FF de Sanxenxo, da Segunda Federación, categoría na que militou o cadro friolés a pasada temporada. Alí estará ás ordes de Cris Oreiro, adestradora que fora protagonista das I Xornadas Futbolinlugo Burela Bonita e que chegou este verán ao cadro das Rías Baixas.

Na Preferente, o Ribadeo aposta para a vindeira campaña pola xuventude. Logo dos fichaxes de Álex Guntín e Diego Ferreiro, o cadro mariñán anunciou a incorporación do centrocampista asturiano Manu Rodríguez, procedente do San Martín. O futbolista desenrolou a súa carreira no Covadonga, co que chegou a debutar en Segunda División B. Causará baixa no conxunto celeste o central Pablo Rivas ‘Prosi‘. O xogador All Star Diego López asina como novo xogador do Castro. O mediocentro do Taboada deixa o club da súa vila.

O Burela incorpora ao defensa Javier Arruñada ‘Arru’, procedente do Lourenzá. O focense levaba tres temporadas no equipo de Santa Cruz. O Meira anuncia a súa terceira fichaxe. Trátase de Fernando Gayoso ‘Fer‘, porteiro de 23 anos que ten raíces na parroquia meirega de Seixosmil. Procede do Castro B e formouse nas categorías inferiores da Residencia. O cadro adestrado por Labrada comenzará a pretemporada con tres porteiros, logo das renovacións de Xabi Rielo e Juanmi. Con todo, o club da Lomba non poderá contar na segunda volta con Xabi Rielo por motivos académicos. O Outeiro de Rei anunciou a fichaxe do defensa Yeray, procedente do San Lázaro. No Guntín continuará un ano máis o defensa Álex Pérez.

Na Segunda, o Ferreira reforza a súa portería logo da saída de Víctor. Álex defenderá a portería do Baliño a onde chega procedente do Calasancio. Será a súa primeira experiencia senior. O incombustible José Gato ‘Pepe‘ renova no Cabreiros e seguirá levando o brazal de capitán no equipo da súa parroquia.