O diario está a honrar ao seu nome nas últimas datas: é diario. Os movementos do mercado non paran. Por exemplo, o Polvorín da Segunda RFEF confirmou o que xa anunciamos na última entrega: Iago Parga e Iago Novo volven ao conxunto albivermello. Ademais, Non Vale Furar adiantou que o filial do CD Lugo podería facerse cos servizos do burelao Julio Delgado.

Na Terceira RFEF, o extremo do Pol Alvaro Herrero xa non irá a proba ao Manuel Candocia, senón que podería incorporarse directamente ao Somozas con ficha sub-23, tal e como indicaron tamén os amigos de NVF. Pola súa banda, o Viveiro incorpora en calidade de cedido ao senegalés Laye Barro, que chega desde o Ourense CF. Juan López renova en Cantarrana.

Precisamente desde Viveiro chega o lateral Agus Pereira á Sarriana, que continúa a armar un proxecto poderoso na Preferente. Na Primeira, o All Star Anxo Otero renova no Chantada Atlético, mentres que Guiti e Hugo Listón tamén seguirán no Sangoñedo, pero coa camisola da SD Chantada. O Atlético Escairón fixo oficial a volta de Javier Montoto ao banquiño do Saviñao, e o Pol renovou a xogadores importantes como Adri Rivas, Pablo Ruiz, Nadir, Nathan e Iván González.

Aínda na Primeira Galicia, o Santaballés confirmou os integrantes do seu corpo técnico: Víctor Rodríguez será axudado por Borja Bouza (2º adestrador) e Jose Antonio (adestrador de porteiros). O campión de copa, o Outeiro de Rei, alongou o seu compromiso con Diego Revuelta, Pedrinho, Aarón Alvelo e Alberto Pacio.