O mercado continúa sen baixar o seu nivel de movementos. Na Terceira División, Adrián Gómez deixa de ser o adestrador de porteiros do Racing Vilalbés por motivos persoais. Ademais o mediocentro David García que formou parte do conxunto de Óscar Gilsanz na última temporada xogará o vindeiro curso no Laracha, un dos equipos recén ascendidos á cuarta categoría do fútbol español.

Pola súa banda, na Preferente, o Outeiro reforza a banda esquerda con Álvaro Barreiro «Palas» procedente do Lugo B. Ademais o corpo técnico encabezado por Juan Peón contará con Antonio Abad como preparador físico, despois dos seus anos de experiencia na Residencia e no CD Lugo. A nova Sarriana de Julio Corral na Primeira Galicia comunicou a renovación de Saul, Diego, Luisma, Bryan e Carnero. Dende o club afirman que faltan aínda máis renovacións por anunciar que se comunicarán proximamente.

Na Segunda Galicia, o Mondoñedo FC renovou a maior parte do seu cadro de xogadores, en total 20 futbolistas que seguirán ás ordes de Israel. Son os seguintes: Aadil Malloul, Adrián Alfonso, Alejandro Gacio, Iban Basanta, Christian Cornide, Denis Oseira, Iago Barreira, Jacobo Mondo, Jesús Maseda, Jose De La Vega, Juan López, Lucas Gómez, Miguel Ángel Lorigados, Ros Sixto, Alberto Lorenzo, Marcos Barreira, Xian Paz, Fabian, Noceda e Vázquez.

Na Terceira Galicia, Suso Vázquez non repetirá como adestrador no segundo ano de vida do Fonsagrada FC. Tampouco segue o seu axudante, Pablo Castro.

No fútbol base, Fran Fernández é novo técnico da estrutura deportiva da ADC Sagrado Corazón. O preparador lucense asina por unha tempada na que dirixirá a un equipo de fútbol 11, outro de fútbol 8, será técnico de apoio noutras categorías e traballará tamén cos gardamallas do club.