Ascenso cervense no norte; Becerreá, Antas e Mila con opcións no sur

O Sanci igualou o partido nos últimos minutos ante o Meira e deixou aos locais sen opcións de ascenso

Foto de portada: Josune Bargueiras

Luca´s Grill
Moreno´s Pizza

A Segunda Rexional está a piques de chegar ao seu desenlace. Cinco equipos mantéñense con opcións de ascenso, dous na zona norte e tres na zona sur. A pasada fin de semana confirmouse o descenso matemático do Mondoñedo e do Bóveda. Pero semella que non van ser os únicos en baixar. Os arrastres obrigarán a máis equipos a peder a categoría. Contamos os detalles nun novo episodio dos #OncesFutbolinlugo.

Na fase de ascenso da zona norte queda unha xornada por diante. A praza de ascenso será seguro para un equipo do concello de Cervo. O Sanci teno de cara con dous puntos de marxe sobre a Candelaria. Na última xornada recibe na Veiga ao Muimenta, mentres que o cadro da Rúa xogará na casa co Meira.

Deportes Élide

A esta situación chegouse logo de que o Sanci conseguise igualar nos últimos minutos o seu duelo co equipo preparado por Labrada. O gol de Uru permitiu que os seus sigan dependendo de si mesmos á par que eliminou ao Meira das opcións de subir.

Pola súa parte, a Candelaria derrotou pola mínima ao Cospeito. Os tres puntos permítenlle seguir coas posibilidades de subir e ademais impídenlle ao conxunto cospeités ter algunha opción no último partido. O conxunto de Jaime Matouse é o equipo menos imbatido do grupo nesta fase con só catro goles encaixados.

Os outros dous encontros do grupo remataron en empate. O Cabreiros é 5º con once puntos logo de igualar a un gol ante o Guitiriz. O partido no Suso Cruz serviu tamén para rendirlle unha homenaxe ao presidente Suso, falecido nesta temporada.

O Celta Barreiros é 6º empatado a puntos co Muimenta logo de que os dous tamén igualaran no seu duelo. Encontro goleador que tivo como algúns protagonistas a dous ex dianteiros do Catro Roldas. Seijas marcou un dobrete para os do Pichón, mentres que Soto marcou un bo tanto que daquela supoñía o 1-3 para os de Barreiros.

Na fase de permanencia da zona norte a falta dunha xornada, confirmouse o descenso directo do Mondoñedo. Non lle terminaron de saír as cousas en ningún momento da temporada ao conxunto adestrado por Julio Castro. Na pasada finde perdeu ante o Fonsagrada como visitante.

Non obstante, o descenso do conxunto mindoniense semella que non vai ser o único deste grupo. Os arrastres poderían provocar máis dun descenso a maiores. O penúltimo clasificado é o Abadín que perdeu nun partido directo ante o Roupar. Está a tres puntos do Matela.

O cadro de Outeiro de Rei tamén perdeu ante un gran Iberia. Os de San Miguel de Reinante impuxéronse nun bo partido de futbolistas como Pisco pola banda dereita e tamén de Joni no medio do campo. O centrocampista marcou un gol e deu dúas asistencias. O Iberia xa asegurou ser primeiro deste grupo e segue sen perder nesta 2ª fase.

Quen caeu por primeira vez neste segundo tramo de competición foi o Xermade. Perdeu no Ventiño ante un Goiriz que necesitaba o triunfo para tratar de evitar problemas.

Na fase de ascenso da zona sur quedan dúas xornadas para o final e semella que a loita vai ser titánica ata o último momento entre a SD Becerreá, o Antas e a Milagrosa. Os tres equipos están nun punto e non hai duelos directos ao ser conxuntos que xa xogaron entre si na primeira fase.

Polo momento o líder é o Becerreá que no último encontro superou pola mínima como local ao Oural. Os laterais Héctor e Santín foron dous dos protagonistas do encontro.

Igualado a puntos co primeiro posto segue o Antas que a pesar de non facer un gran encontro, dispuxeron dalgunha ocasión moi clara e marcaron dous goles diante do Chantada B que só fixo un. O dobrete do Antas foi autoría de Álex Diéguez, un dos tantos de falta. O equipo da Ulloa é o menos goleado do grupo, só encaixou dous tantos con Melendo baixo paus.

A Milagrosa está a un punto dos seus dous rivais directos despois de vencer tamén pola mínima ante o Río Sil. O conxunto soberino pelexou con varios dos seus futbolistas con molestias.

Sen opcións de loitar pola primeira praza quedaron o Paradela e o Ferreira que xogaron entre si con vitoria para os de Pantón; tamén por un gol de diferenza. O Paradela igualou o gol inicial do Ferreira, pero un erro dos pupilos de Rubén Bergantiños propiciou o triunfo visitante.

No grupo de permanencia de catro equipos xa rematou a liga co descenso directo do Bóveda. O equipo preparado por Pasín caeu na casa do Palas, desaproveitanto que o seu rival máis directo tamén caeu no seu encontro.

Non obstante, o Incio tamén o ten complicado para manter a categoría polos xa comentados arrastres. No último partido caeu ante un Corgo que é o único que pode darse por satisfeito e estar tranquilo mentres non remate a competición nas outras divisións.

No grupo de permanencia de cinco equipos quedan dúas xornadas para o final. O Brollón lidera a clasificación con 17 puntos logo de vencer ao Páramo. No medio dos dous sitúase o Sporting Lucense que derrotou pola mínima ao Quiroga.

O conxunto quirogués tivo dobre partido na finde. Primeiro xogou nos Medos (sigue exiliado do San Martiño) ante o Sporting Lucense. O domingo recuperou o seu partido aprazado ante o Santa Comba. Empataron o partido polo que o Quiroga segue último a dous puntos do Santa Comba. O equipo da parroquia lucense xa non estivo dirixido por Martín Real. O técnico non segue como adestrador dende hai unhas semanas.

Imagen por defecto
Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

Artículos: 549

Deja un comentario

Los datos que proporciones mediante este formulario serán tratados por Futbolinlugo como responsable de esta web. La finalidad de la recogida de estos datos se realiza solamente para responder y moderar los comentarios. Estos datos estarán almacenados en los servidores de PROFESIONAL HOSTING, situados en la Unión Europea (política de privacidad de Profesional Hosting). Puedes ejercer tus derechos de acceso, rectificación, limitación y supresión enviando un correo electrónico a diegopolc8@gmail.com.