Rematou a competición regular na Segunda Galicia e remtaron tamén os play-offs na Terceira, polo que estas notas son as últimas en canto a liga se refire. Non obstante, o fútbol afeccionado das categorías máis inferiores non remata aquí. En 10 días arrinca a Copa Deputación da que xa se coñecen os calendarios e da que estaremos moi pendentes nas nosas notas.
O ás: Rus do Cospeito
Daniel Pardo Rus do Cospeito foi un dos mellores xogadores sobre o terreo de xogo na final pola salvación na Segunda Galicia norte entre o Catro Roldas e Cospeito. A pesar de que non tivo acerto de cara o gol nas varias opcións que tivo, o dianteiro deu a asistencia do primeiro gol do seu equipo tras unha acción de pundonor na que recuperou o balón ao seu favor. Ademais na segunda metade forzou o penalti co que o seu conxunto acabaría levándose a vitoria e salvando a categoría.
A figura: Adrián do Rubián
O Rubián tiña un partido a vida ou morte na casa do Garabolos. O que perdera o encontro quedaba a expensas de como se vaian dando as cousas nas categorías superiores para ver se hai arrastres. No tramo inicial do choque apareceu o porteiro Adrián García con dúas boas paradas para evitar que os locais se adiantasen no marcador. A partir de aí, o Rubián estivo acertado en ataque e acabou lévandose os tres puntos cun resultado de 0-3 que os deixa na Segunda Galicia. O Garabolos estaría descendido nestes momentos pero podería salvarse se non hai arrastres.
Nin pé con bóla: Meira
O conxunto meirego tamén está pendente dos arrastres que poidan caer de Primeira para saber se pode continuar na Segunda Galicia despois de quedar terceiro por abaixo. O Meira realizou unha moi mala segunda volta que o colocou na zona baixa da táboa. Non conseguiu ningunha vitoria nos últimos doce partidos. A pesar diso chegaron con vida ao derradeiro choque da competición regular, pero perderon no derbi ante o campión da liga, o Pontenova por 5-0.
Demasiado intenso: Couso do Catro Roldas
No partido entre equipos chairegos entre o Catro Roldas e o Cospeito reinou por maioría a deportividade. Apenas nos últimos instantes de partido, David Couso foi expulsado cando xa tiña un cartón por pegarlle unha patada ao balón cando a pelota se atopaba na banda para realizar un saque dende ese mesmo lado.
